SHILLONG: Meghalaya a·doko Voice of the People’s Party (VPP) bilakbatrorobaenga ine VPP-ni ku·wattimgipa Batskhem Myrboh a·kangatenba, iako ku·rachakchina gita gipin political dolrangkoba didiataha.
Myrboh-ni aganani gitade, Meghalaya a·doko VPP dal·baroroan baksana bilakbatrorobaenga aro an·tangtangni man·gnini giminsan chanchiaigipa politician-rangko chu·gimik bon·atkujaskalde VPP bilakrorokuangaigen.
“Re·anggipa 2023 bilsini Assembly election dipetan VPP-ko ra·chakna a·bachengtokaha aro ia party dal·roroangkuaigen,” ine VPP-ni ku·wattimgipa aganaha.
VPP dolara East Khasi Hills a·jaosan bilakgipa ong·aiani gimin ian district wise party gitasan ong·aia ine adita salrangna skang UDP-ni chonnike aganahani gimin Myrboh, ia kattarangko aganaha.
Mitam manderangde an·tangtangni wilwilao ong·engako ong·ja gita dakmikesan dongaienga ine janapatengon, “Chong·motko ra·chakna skichina anga uamangko didienga,” ine VPP-ni dilgipa aganaha.
Myrboh-ni aganani gitade, 2021 bilsio VPP-ko bikotchengmiting somoio mitam politician-rang uamangko mikcheptokachim aro Assembly-o membor saksaba donggijasa party-ko bikotenga ine agantokahachim.
“Tangka paisa gri election-o susae an·tangtangni somoirangko bon·atjachina uamang chingna ku·pattitokahachim indiba re·anggipa bilsini Assembly election-ni result-rangko parakatahaon uamang aiao inmantokaiaha,” ine ua aganaha.
Ia Lok Sabha election-oba Shillong parliamentary constituency-ni manderang VPP-kon seoktaigen ineba Myrboh, an·tangni ka·dongchakenganiko parakataha.
“Mitam politician-rang VPP-ko regional party-na qualify ong·kuja ine agantokenga indiba VPP-ko ECI, state party ine recognize ka·aha,” ineba ua aganaha.