SHILLONG: Khasi Students Union (KSU)-ni ‘dosgri’ membor-rangko skatang rim·e, neng·nikaniko on·jachina gita Bristibar salo KSU, a·dok sorkari aro police-rangna mikrakataniko on·angaha.
“Na·simang chingni membor-rangko dokkol ka·angkua ong·ode chingaba bilrangko jakkalna draatako man·gen aro ian a·doko so·sojengjeng ong·atanikosa ra·baani ong·gen. Ian sorkarina sko sana nangani ong·gen,” ine KSU-ni general secretary Donald V Thabah, Bristibar salo kobor ra·timgiparangna aganaha.
KSU-ni membor-rangko iandake police-rangni matnanganiara gital katta ong·ja maina pilak a·sel ong·ani somoirangoba pangnan police-rang KSU-kosa matnangronga ineba ua aganaha.
“Khasi aro gipin jatrangni gisepo maiba obosta ong·genchimode uan pangnan chingkon potchipaigen ine chinga ma·sisoronga. Iandakgipa a·sel ong·ani somoirango pangnan KSU-ni membor-rangkosa rim·chengronga,” ine ua aganaha.
Budbar salo, Sohra police station-ona re·jomanggipa KSU-ni membor-rangko rim·jahani giminba ua police-rangko sing·doataha.
Thabah-ni aganani gitade, Budbar salo Sohra police station-ona re·jomanggipa KSU-ni bang·bata membor-rangni nokrangkon police-rang una skang chadrapeahachim.
“Indiba police-rang uamangko rim·jaha aro ian namen aiao inmanani ong·a,” ine ua aganaha.
KSU South Khasi Hills District-ni president Reebok Diengdoh-ni nokonaba police-rang re·angahachim ineba KSU-ni general secretary parakataha.
“Ua an·tangan Sohra police station-ona re·ange mikkangpaahaoba maini gimin uko rim·skajaha? Chingni chanchichipani gitade police-rango maiba miksongani dongesa uko rim·jaha,” ine Thabah aganaha.
