SHILLONG: Ma·mongo BJP-chi dilenggipa NDA sorkariko rikani chu·gimik bilsi 10 gapahaoba, Meghalaya a·dokna dingtang dingtang dabianirang, jekai Inner Line Permit (ILP), Khasi-Garo ku·sikrangko Eighth Schedule-o chapatani aro uandakgipa dabianirangko da·onan chu·sokatchipkujaenga.
Khasi aro Garo ku·sikrangko Indian Constitution-ni Eighth Schedule-o chapatchina didie Meghalaya Assembly, 2018 bilsion resolution-ko pass ka·ahachim indiba da·o bilsidok ong·pilengahaoba ia dabianiko sorkari chu·sokatchipkujaenga.
ILP-naba Meghalaya Assembly, 2019 bilsion resolution-ko pass ka·ahachim aro iani bidingo dingtang dingtang dolrangba changni chang ma·mong sorkarini dilgiparangna sedoatahachim indiba da·alonan ia dabianiba be·en pil·na man·chipkujaenga.
2019 bilsion BJP-chi dilenggipa NDA sorkari, gnigipa changna ma·mongo sorkariko rikpiltaina man·ahachim aro ua somoioni da·o bilsi bonga bon·e gnigipa term matchotpilahaoba ia dabianirangko ma·mong sorkari knachakkujaenga.
ILP-ni bidingo dingtang dingtang dolrang, Union Home Minister aro Prime Minister Narendra Modi-naba changni chang sedoatahachim indiba ia dabianiko nipilengkua inesa ia dolrangna aganchakaiahachim.
Da·o ia bilsio Lok Sabha election-ko ong·attaiengahani gimin adita jarangni gisepon gital sorkariko riktaina siengaha aro ia change ma·mong sorkari, a·dokni dabianirangko chu·sokatgenma ma skango gitan knachakgija dongkuaigenma ukode somoi ong·ahaosa ma·sina man·aignok.