TURA: North Garo Hills a·jani Superintendent of Police (SP) Bruno A Sangma-ra, Tura-ni MP aro NPP-ni MP candidate Agatha K Sangma baksa bak donggipa ong·ani gimin SP-ko dingtang biapona kam apjitatchina didie social acitivist saksa Nilberth Ch Marak, Chief Election Commissioner (CEC)-na sedoataha.
North Garo Hills a·jani SP Bruno Sangma-ra, Agatha Sangma-ni segipani boningtang ong·achim aro apsan a·jaon songdongenggipa ong·achim ine nikna man·a.
North Garo Hills a·jani SP-ko kam apjitatchina gita CEC-na sedoatengon, North Garo Hills-ni SP aro South Garo Hills a·jani ning·o donggipa Gasuapara-ni Customs Officer sakgnian, chini, rasin, gue aro uandakgipa ma·manti bosturangko Bangladesh a·songona badingatanio dakchake on·giparang ong·a ineba Nilberth matnangataha.
Garo Hills-ni ma·manti bosturangko Bangladesh a·songona niam gri badingatengani a·sel jolo songdongenggiparang aro mongsongbate gue aro uandakgipa ma·manti bosturangko game ge·e cha·enggipa manderang neng·nikanirangko chagrongna nangtokenga ineba ua, CEC-na sedoatgipa chittio janapataha.
Iani bidingo Garo Hills-ni manderang, changni chang SP-na u·iatenba, niam gri badinganiko champengchina mol·molatahachim indiba ua maming ja·kurangko de·jaha ineba Nilberth matnangataha.
Ia mandeni parakatani gitade, Customs Act 1962-ni Section 11(1)-o India aro dingtang dingtang a·songni gisepo niam gri badingsrukaniko raken champengani dongachim aro India a·songni chinirangko gipin a·songrangona badingatanikoba ma·mong sorkarian champengatahachim.
“Indake ong·genchimoba Customs department aro North Garo Hills a·jani SP, Bangladesh a·songona badingsrukanirangko champengna gita maming ja·kurangko de·jaha,” ine Nilberth matnangataha.
Nilberth-ni CEC-na badi ka·anio parakatani gitade, Lok Sabha election-na Model Code of Conduct (MCC)-ko ra·gatani ja·manba North Garo Hills a·jani SP, a·dokni Chief Minister aro gipin dilgiparangko an·tangni nokona okamatahachim.
“Ian election-na dongimin niamko pe·ani gita ong·a maina election-ni kamrango minister-rang, sorkari official-rangko jakkalna gita MCC-on champengani dongachim,” ine Nilberth parakataha.
North Garo Hills a·jani SP-ko apjitatchina didiatengon, NGH-ni Kharkutta songan SP aro uni jikgipani song ong·a aro ua Agatha Sangma-ni segipani boninggipaba ong·a ine Nilberth janapataha.
