SHILLONG: Meghalaya a·doko Congress baksa bakrima ine Trinamool Congress (TMC)-ni matnanganiko Meghalaya a·dokni BJP raken jegalataha.
Meghalaya BJP-ni ku·wattimgipa M Kharkrang-ni parakatani gitade, ma·mongo National Democratic Alliance (NDA)-o apsan bakrimenggipa dol ong·ani giminsa da·o Lok Sabha election-o BJP, NPP-na chakpaaniko on·enga indiba Congress dol baksa bakrima ine agangipa kattarangde tol·e matnanggipa kattarangsan ong·aiachim.
“NDA-o bakrimgipa dol ong·ani giminsa Meghalaya a·doko NPP-na BJP chakpaaniko on·enga. Congress baksa BJP bakrima ine agananide kakketan ong·srangja. Iandake matnanganirangko dakengon, sakkirang dongchengna nanga,” ine Kharkrang aganaha.
Meghalaya a·doko NPP-BJP aro Congress dolni gisepo bakrimaniko Meghalaya Pradesh Congress Committee (MPCC)-ni president Vincent H Pala-sa dakdilgipa ong·a ine TMC-ni dilgipa Mukul Sangma-ni matnanganiko jegalatskaengon, election-na skangde bang·en matnanggrikanirang dongaia indiba iandake matnanganirangko dakna skang sakkirangba dongna nanga ine BJP-ni ku·wattimgipa parakataha.
INDIA Bloc-o apsan bakrimenggipa dol ong·genchimoba Tura Lok Sabha constituency-oni susaengani gimin Congress dolko TMC-ni dilgipa Mukul Sangma jegalatahachim aro NPP-BJP-Congress dolko bakrimatanio MPCC-ni president Vincent Pala-sa dakdilgipa ong·a ine Mukul matnangahachim.
Re·anggipa 2023 bilsini Assembly election-ni ja·man NPP, BJP aro Congress dolrang bakrimna a·bachengaha aro Opposition dolni dilgipako seokna chalakki dakaha ineba ua matnangahachim.
Iani bidingo aganchakaniko on·angskaengon, “NPP-ni giminde anga mamingkoba aganna man·jawa indiba Congress baksade BJP bakrima dongja,” ine Kharkrang parakataha.