TURA: Tura Lok Sabha constituency-o United Democratic Party (UDP)-ni MDC Ashahel D Shira-ba National People’s Party (NPP)-ni candidate aro Tura-ni MP Agatha K Sangma-na chakpaaniko on·angaha.
Tura Lok Sabha constituency-ode UDP, candidate-ko susaatjahachim indiba Shillong Lok Sabha seat-ode HSPDP baksa nangrime Regional Democratic Alliance (RDA)-ni candidate Robertjune Kharjahrin-ko susaatskaengachim.
Indake ong·engon, Sombar pringo GHADC-ni Batabari MDC Ashahel D Shira, Rajabala Assembly constituency-o an·tangna kam ka·enggipa bang·a manderang baksa NPP-ni national president aro a·dokni Chief Minister Conrad K Sangma-ni Tura-o ong·atanggipa tom·bimonganio bakko ra·eaha aro Tura Lok Sabha constituency-o NPP-ni candidate-na chakpaaniko parakeaha.
Iana skang, Garo Hills-o Garo National Council (GNC) aro Bharatiya Janata Party (BJP)-ni dilgiparangba NPP-ni candidate Agatha K Sangma-na chakpaaniko on·angahachim aro uandaken da·o NPP-ni candidate-na kamrangko ka·tokengahachim.
Tura Lok Sabha constituency-o NPP-ni candidate Agatha K Sangma, Indian National Congress (INC)-ni candidate Saleng A Sangma, Trinamool Congress (TMC)-ni candidate Zenith M Sangma aro Independent candidate Labenn Ch Marak baksa susaenga.
