SHILLONG: Adita salrangna skang, Arunachal Pradesh a·doko election campaign-na re·angani somoio a·dokni Chief Minister aro National People’s Party (NPP)-ni national president Conrad K Sangma baksa re·angenggipa garirangni janggilo re·angpaenggipa gari bolsaoniko krorsa batpile tangka man·ahani gimin dingtang dingtang Opposition dolrang, NPP-ko matnangtokengon, ia dolrangni matnanganiara election-o vote man·na chalakki dakanisan ong·aia ine NPP-ni state president aro a·dokni Deputy Chief Minister Prestone Tynsong parakatskaaha.
Tynsong-ni parakatani gitade, rim·a man·gipa gari ba mandeba Chief Minister Conrad Sangma baksa maming bak dongja inen Arunachal police-rangba talataniko on·manahachim.
“Meghalaya a·dokni tangkarangko Arunachal Pradesh a·dokni election-na Chief Minister Conrad Sangma cha·uangaha ine opposition dolrang matnangtokenga indiba ian kakket ong·ja. NPP-ni president aro a·dokni Chief Minister maming saloba indakgipa kamko ka·jawa aro ka·naba on·jawa ine anga a·dokni manderangna talataniko on·na ska. Ia pilakan Lok Sabha election-o vote-rangko salna opposition dolrangni chalakki dakanisan ong·aia,” ine Tynsong aganaha.
Banoba iandake bang·bea tangkarangko mande baksa rim·genchimode uamang an·tangtangba badiaba political dolko matnangna ba nangatna jotton ka·aigenchim ineba NPP-ni state president aganaha.
“Uni gimin ian election-na matnanggrikanisan ong·aia aro Arunachal Pradesh-o Election official-rangni rim·gipa tangkarangara Chief Minister-ni tangkarang ong·ja ine anga manderangna talataniko on·na ska,” ine ua aganaha.
Arunachal Pradesh a·doko gong kror 1 batpile gari bolsaoniko man·ani ja·man Congress aro gipin dolrangba, NPP-ni national president aro a·dokni Chief Minister Conrad Sangma-ko matnangtokahachim ine nikna man·a.
Ia a·selni bidingo tale ma·sina man·na gita inquiry-ko dakchina gitaba Opposition dolrang dabitokahachim.