TURA: Garo Hills-o politics-ni bimang dingtangroroangengaha aro sorkarini kamrang namroro silroroaniko ra·bana man·engahani gimin opposition dolrangni ku·rangba ‘gam·angjaengaha’ ine Mongolbar salo, National People’s Party (NPP)-ni candidate aro Tura-ni MP Agatha K Sangma parakataha.
Mongolbar salo ua, Samanda Megapgre songona re·ange songni manderangko grongeanio ia kattarangko aganaha. Ia tom·anio Agatha baksana uni segipa Dr Patrick R Marak, uni ma·gipa Soradini K Sangma aro NPP-ni dingtang dingtang dilgiparangba dongpae bak ra·angtokaha.
Ia tom·anio NPP-ni candidate, songni manderangna aganprakangkuengon, an·tangko mande ra·bee rimchaksoahani gimin songni manderangko, NPP-ni dilgiparangko aro una chakpaenggipa gipin dolrangni dilgiparangkoba mittelpilangaha.
“Garo Hills-ni bang·bata biaprangona angni re·angon anga manderangni chakpaanirangko nike namen katchabea. Ia election-o rakbee kamrangko ka·engani gimin anga party-ni dilgiparangko aro chingna chakpaaniko on·enggipa dingtang dingtang dolni dilgiparangkoba anga mittelna ska,” ine Agatha aganaha.
Garo Hills-o politics-ni bimang dingtangroroangengaha ine janapatengon, “Badiaba badiaba biaprangode opposition dilgiparangko nikna man·angjaengaha. Adita salrangna skangsan anga Raksamgre-ona re·angaha aro uano anga opposition dolrangni ku·rang gam·angjaengaha ineba nikna man·aha,” ine Tura-ni MP parakataha.
Mendipathar-o PepsiCo karkanako kulina kamrangko a·bachengatengahani gimin janapangengon, ia project-ko a·bachengatanichi jolo songdongenggipa manderang namgnirangko man·gnok ine ia project-ko a·bachengatahani gimin jolni MLA-ko aro Chief Minister Conrad Sangma-koba Agatha mittelpilangaha.
Election-na campaign ka·enggipani gimin janapangengon, “Batanggimin bilsirango MLA election-na campaign ka·engmiting somoirangode bang·bata biaprangon rama jal·lang, bijoli aro china neng·nikanirangko manderang janaprongachim indiba da·alo ia bang·bata biaprangon rama jal·langrangni namako, bijolini teng·aniko aro manderangni chu·onga gita chi man·aniko nikna man·engaha,” ine Agatha a·kangataha.
