TURA: Tura jillani municipality area-ko apalbatatna gita Urban Affairs department-ni gital dake saltaigipa Draft Master Plan-ko a·king dambrini Nokmarang raken jegalataha.
Adita salrangna skangsan, GHADC-ni Special Session-ko ong·atanioba, Tura jillani ning·o donggipa Danakgre, Doldegre, Alotgre, Darechikgre, Duragre, Chasingre, Ballonggre aro Rongkhongre a·kingni Nokmarang aro GHADC baksa agangrikchenggija Meghalaya sorkarini Urban Affairs department, Draft Master Plan-ko tariaha ine matnangenba, iako GHADC-ni MDC-rang raken jegalangtokahachim.
Iani bidingo Chasingre, Rongkhon Edenbari, Rongkhon Megonggre aro Alotgre a·kingni Nokmarangba jegalatskaengon, “Chingni a·kingrangko maming u·iatchengani gri Tura Municipality ning·o napatna gita Urban Affairs department-ni Draft Risk Informed Based Master Plan tarianiko chinga chingni maharirang baksa raken jegalenga,” ine Urban Affairs department-ni Director-na sedoatgipa chittio Nokmarang parakataha.
Ia a·kingrangara Garo Hills Autonomous District Council (GHADC)-ni ning·o ga·akgipa a·kingrangsa ong·a ine janapatskaengon, “Chinga GHADC-ni nirok sandianion dongna kusi ong·batenga aro GHADC baksana Urban Affairs department-ni nirokanikode nangnikjaenga,” ine a·king dambrini Nokmarang parakataha.
Koborko on·ani gitade, Tura jillani ning·o donggipa Danakgre, Doldigre, Alotgre, Darechikgre, Duragre, Chasingre, Ballonggre aro Rongkhongre a·kingni Nokmarang aro GHADC baksa agangrikchenggija, ia a·kingrangko Tura Municipality-ni ning·o napatna Urban Affairs department, Draft Master Plan-ko tariahachim.
A·king Nokmarang aro GHADC baksa maming agangrikchenggija ia a·kingrangko Tura Municipality-ni ning·o napatna sorkarini miksonganiara, Indian Constitution-ni Article 243ZC-ni ning·o dongimin niamrangko pe·ani gita ong·enga ine adita salrangna skangsan Tura-ni MDC Bernard Marak-ba matnangatahachim.
