SHILLONG: National People’s Party (NPP) aro Bharatiya Janata Party (BJP) dolrang adasagrik gita dolsa dolgipinna dakchakgrikenga aro iako a·dokni manderangba namen ma·sia ine Voice of the People’s Party (VPP)-ni president Ardent Miller Basaiawmoit matnangataha.
“BJP-de Meghalaya a·doko dal·na man·jawa ine ma·sienga maina mongsonggipa gadangon uamang chu·sokna gita man·jaha. Uni giminsa BJP, NPP baksa bakrimaha aro da·ode ia dolrang ‘adasa’ gitasa ong·aha. NPP-ba CAB-na Parliament-o chakaha aro da·o ia Lok Sabha election-o BJP, NPP-na dakchakskaani ong·engaha,” ine Budbar salo, South West Khasi Hills a·jani Mawkyrwat-o VPP-ni tom·aniko ong·atanio Basaiawmoit aganaha.
VPP president-ni parakatani gitade, UDP aro HSPDP dolrangni nangrime bikotgipa Regional Democratic Alliance (RDA)-ba an·tangtangko ku·cholsan ong·gipa dol ine manderangko togienba vote-rangko salna jotton ka·enga indiba chong·motode ia dolrangara ma·ekgrikgiparang gitasan ong·aiachim.
“Uamangni agananiko manderang goka ong·ani gimin bebera·aigen ine uamang chanchienga indiba RDA-ni election-na tom·anirangko ong·atanio HSPDP-ni MLA-rangde changsaba bak ra·ja ine manderang ma·sitokaha,” ine Basaiawmoit aganaha.
VPP chegenchimode a·doko tangka paisa jakkalsretani parak ong·gnok ine kentokengani gimin BJP, NPP, RDA aro Congress pilakan VPP-ko ama man·atna gitasa krengenga ineba VPP-ni president a·kangataha.
“Maini gimin uamang VPP-na indita kenenga….maina chinga tangka paisa cha·aniko, kangal cha·a sianiko aro pilak ong·gija dakgipa kamrangko bon·atna talen aganmanaha,” ine Basaiawmoit aganaha.