SHILLONG: Meghalaya a·doko aro mongsongbate Khasi Hills-o gipin jatrangni kosako chadrapanirang batroroengani gimin Meghalaya Linguistic Minority Development Forum (MLMDF) suk ong·gijaniko parakatenba, iani bidingo National Investigation Agency (NIA) ba Central Bureau of Investigation (CBI)-chi inquiry dakchina gita dabiangaha.
Re·anggipa March jani 27 tariko, CAA-ko jegale dingtang dingtang dolrangni Ichamati-o jinma re·jomaniko ong·atangani ja·man gipin jat mande sakgniko ma·sina man·gijagipa manderang so·ote galahachim aro uni ja·man re·anggipa Budbar saloba Shillong songjinmani Mawlai Mawroh jolo nok rikenggipa mande sakgittamko mikkang katipgipa manderangni chadrapanichi sakgittamoni saksade siangna gita nangahachim.
Ia a·selrangna suk ong·gijaniko parakatengon, Meghalaya a·dokara India a·songni bakan ong·genchimoba iandake a·songtangni mandeskakon kragija dake so·ote galaniara namen kragijani ong·a aro iana Meghalaya sorkarioba uamang ka·dongchakna man·jaengaha ine MLMDF parakataha.
“Uni gimin ia a·selrangko NIA ba CBI-chi sandirokenba dos dakgipa manderangna rakbatsranggipa sastirangko on·china chinga dabienga,” ine MLMDF parakataha.
So·ota man·gipa manderangni nokdangrangna chu·onga gita compensation-ko gamchina aro saknaa man·gipa manderangko sanna bananio pilak nanga korosrangko gamchina gitaba MLMDF dabiangaha.
