SHILLONG: Re·baenggipa April-ni 19 tariko ong·atenggipa Lok Sabha election-na skang, a·dokni skotong Shillong songjinmao aro gipin biaprangoba mande so·otani aro uandake niam pe·ani kamrangko bang·en nikna man·ahani gimin Sukrobar salo a·dok sorkari tom·aniko ong·atangenba, a·dokni skotong songjinmao aro gipin biaprangoba chel·gipa sipai dolrangko bariatna tik ka·angaha.
Ia tom·aniko, a·dokni Chief Secretary dilangaha aro tom·anio Police aro Home department-ni dal·dalgipa official-rangba bak ra·angaha.
Ia tom·anio a·dok sorkarini official-rang tom·e chanchirimangengon, tom·tomaniko rakkiangna aro so·sojengjeng ong·aniko chel·chakna gita sipai dolrangko dondapatgen ine tik ka·angaha.
A·dokni dingtang dingtang biaprango dakgrik dinggrikani aro mande so·otanirangko nikna man·ahani gimin niamo pangchake ja·kurangko de·china gita ia tom·anio police-rangna ge·etaniko on·ataha.
Indake ong·engon, adita salrangna skang Mawlai Mawroh-o nok rikenggipa mande saksako so·otani bidingo police-rang, politics-ni gita jak dongama dongja ukoba ning·tue am·sandienga ine kobor on·timgiparang parakataha.
Ia a·selni bidingo police-rang adita sakkirangko man·engaha ine u·iatengon, iani bidingo chu·gimikkode da·o dipet parakkujana gita police-rang u·iatskaaha.
Re·anggipa March jani 27 tariko, CAA-ko jegale dingtang dingtang dolrangni Ichamati-o jinma re·jomaniko ong·atangani ja·man gipin jat mande sakgniko ma·sina man·gijagipa manderang so·ote galahachim aro uni ja·man re·anggipa Budbar saloba Shillong songjinmani Mawlai Mawroh jolo nok rikenggipa mande sakgittamko mikkang katipgipa manderangni chadrapanichi sakgittamoni saksade siangna gita nangahachim ine nikna man·a.
