SHILLONG: Batanggimin sal somoirango, Lok Sabha election-na campaign ka·engmiting somoio badiaba badiaba political dolrangni gisepo nanggrikanirangko nikna man·ahani gimin Lok Sabha election-ko nama bewalo aro tom·tomao ong·atna man·na gita Sukrobar salo, Meghalaya a·dokni Chief Electoral Officer (CEO) BDR Tiwari, dingtang dingtang political dolrang baksa tom·e chanchirimangaha.
Ia tom·anio a·dokni CEO, dingtang dingtang political dolni dilgiparang baksa chanchirimangengon, election-na campaign ka·ani somoirango tom·tomaniko rakkichina aro election-na dongimin niamrangko ja·rikchina gita political dolrangko didiangaha.
Tom·a matchotani ja·man kobor ra·timgiparangna talataniko on·angengon, “Pilak political dolrangan tom·tomaniko rakkina nangnikaniko paraktokaha aro election-na kamrangko ka·anio so·sojengjeng ong·atani kamrangko ka·jana gita chanchirimangaha. Uamang pilakan Election department baksa bakrimaniko on·na ku·rachakaha,” ine CEO parakataha.
Mikkangchi iandake so·sojengjeng ong·anirangko champengna gita dingtang dingtang a·jani deputy commissioner aro superintendent of police (SP)-rangkoba, dingtang dingtang dolrangni campaign ka·anirangko nirok sandichina gita Election department ge·etaniko on·ataha ineba Tiwari parakataha.
Adita salrangna skangsan, badiaba badiaba biaprango NPP dolni tom·aniko ong·atani somoio VPP-na kam ka·enggipa manderang, chrik a·bokanirangko dake golmal ka·ani ja·man dolgnini gisepo nanggrikanirangko nikna man·ahachim.
Iani bidingo badi ka·ani ja·man VPP-ni president-na Election Commission, show cause notice-koba on·ahachim.