SHILLONG: 1972 bilsini State Reservation Policy-ko Voice of the People’s Party (VPP)-ni jegale jingjengatanichi maming namgnirangkon ra·bana man·jaha ine National People’s Party (NPP)-ni state working president Pyniaid Sing Syiem parakataha.
“VPP-ni jingjengtanichi gipin jatrangnasa namgni ong·pilaha indiba a·dokni Tribal-rangde maming namgnikon man·jaha. Batanggimin bilsisani gisepo kamna ra·aniko niatgenchimode Khasi aro Jaintia-rangni gisepo kamko man·giparang namen komibata ine an·ching nikatna man·gen,” ine NPP-ni dilgipa aro KHADC-ni CEM, Puriang-o NPP-ni candidate-na campaign ka·engmiting somoio aganaha.
Syiem-ni aganani gitade, Job Reservation Policy-ni bidingo VPP-ni jingjengataniara manderangko dilsretna jotton ka·anisan ong·aiachim.
2015 bilsio Shillong Municipality-ni a·palrangonaba MUDA Building Bye-Laws-ko sokatna sorkarini u·iataniko a·bachengode jegalenba da·o sorkarini u·iataniko ra·chakpiltaiahani giminba KHADC-ni CEM, VPP-ni president Ardent Miller Basaiawmoit-ko matnangataha.
Building bye-laws-ko Shillong Municipality-ni a·palrangonaba sokatna manchiani bidingo ua (Ardent), a·dokni gitcham Chief Minister Dr Mukul Sangma baksaba songgrikaniko dakpilahachim ineba Syiem aganaha.
MUDA-ni kosako Basaiawmoit-ni jingjengataniara ‘dakmikanisan’ ong·aia maina ja·mano ua an·tangan MUDA Building Bye-Laws-ko Municipality-ni a·palrango nangatna miksonganiko ra·chakpilaha ineba NPP-ni state working president matnangataha.
