SHILLONG: Term gittam joljolna Congress dolni rim·kepe dongenggipa Shillong Parliamentary seat-ko ia changode National People’s Party (NPP) ra·sekgnok ine NPP-ni candidate aro a·dokni Cabinet Minister Ampareen Lyngdoh a·kangataha.
Meghalaya a·doko Congress dol napsrimmanaha ineba Lyngdoh parakataha.
“An·chingni Meghalaya a·dokode Congress napsrimaha. Skangode anga an·tangba Congress-ni membor ong·e Congress dolko cheatna gita chinga ku·cholsan kamrangko ka·achim indiba da·ode a·doko Congress pilakni gitan tang·onangaha. 2019 bilsini Lok Sabha election-o da·o Shillong-ni Lok Sabha MP ong·enggipa Vincent H Pala-ni cheani somoio chinga sak 18-20-mangni gita Congress MLA-rang dongachim indiba da·ode sakbongasanaha. Skangode angaba Congress-ni membor-an ong·achim aro anga maini gimin Congress-oni ong·kataha manderang pilakan a·selko ma·sia,” ine Lyngdoh aganaha.
Lyngdoh-ni aganani gitade, ia chang Lok Sabha election-o manderang, election-o susaenggipa candidate-rangko niesa seokgen.
“An·chingni Meghalaya a·doko party politics bang·e cholibreja aro manderang, candidate-ko niesa seokronga. Candidate-rangko maiko dakaha uko niesa seokronga,” ine NPP-ni candidate aganaha.
NPP-ni mongsonggipa miksonganiara pilaknan apsan bichalko on·anian ong·a aro iano pangchakesa kamko ka·a ineba Lyngdoh aganaha.
“Changbongana kingking MLA ong·anio angni kamrangko nikesa NPP-ni dilgiparang, ia Lok Sabha election-o susana gita angko seokaha. Angni MLA ong·aniko NPP-na on·kangchina aro MP-na susachina angko aganahani giminsa anga da·alo NPP-ni candidate ong·e susaenga. Shillong Lok Sabha constituency-o susaenggipa sakdok candidate-rangoni sako ia constituency-ni kona noksikona re·angako nikaha ine manderango sing·e niaibo. Uni gimin ia changode Shillong parliamentary seat-ko NPP ra·skagnok ine anga ka·donga. Sak 28 MLA-rangko man·anide ramram katta ong·ja aro NPP-on MLA-rang bang·batenga,” ine Shillong Parliamentary constituency-ni NPP candidate aganaha.
