SHILLONG: Meghalaya a·dokni Lok Sabha constituency damgnion National People’s Party (NPP)-ni dilgiparangko seoke watatgenchimode, ma·mongo BJP-chi dilenggipa NDA sorkario Kristian dilgiparang bilakbatataniko man·gen aro Kristianrangko warachakna gita nambate ku·rang on·na man·gen ine Mongolbar salo, Bharatiya Janata Party (BJP)-ni dilgipa aro MLA Sanbor Shullai aganaha.
Shillong Lok Sabha constituency-o Ampareen Lyngdoh aro Tura Lok Sabha constituency-o Agatha K Sangma, NPP-ni candidate ong·e susaengachim ine nikna man·a.
“NPP-ara BJP-chi dilenggipa NDA sorkarini bak ong·ani gimin NPP-ni candidate sakgnian seokako man·genchimode Kristianrangni namgnina ku·rangko bilakbate on·na man·gen,” ine Shullai aganaha.
Ia Lok Sabha election-ni bidingo hisapsoani gitade NDA seat dam 400-na baten chena siengani gimin gipin party-ni MP-rangko seoke watatgenchimode uamangni ku·rangko knachakjawa ineba ua aganaha.
“Ia Lok Sabha election-o Meghalaya a·dokni manderang, Congress ba gipin dolni candidate-rangko seoke watatgenchimode bilsi bonga noksan ong·na nanggnok,” ine BJP MLA aganaha.
Media-o BJP-ko matnangna jotton ka·rongengani gimin ua dingtang dingtang political dolrangkoba jegalataha.
Meghalaya a·doko badiaba badiaba political dolrang, kenjagokataniko ra·bana jotton ka·enga ine janapatengon, “An·chingni songsalo bak dakna jotton ka·enggiparangna an·ching chol on·gija a·dokni namroro silroroaninasa chanchie re·mikkangna nangenga. Shillong-ni skia man·gipa manderang tom·tomaniko nangenga ong·ode April-ni 19 tariko, namgipa dilgipako seokanichi an·tangtangni ku·rangko on·china,” ine Shullai parakataha.
NPP-ni vote-rangko bak dakanichide Congress dolna ba gipin dolrangnasan namgni ong·aigen indiba BJP-chi dilenggipa NDA sorkariode maming ku·rangko on·na man·jawa ineba BJP-ni dilgipa parakataha.
Meghalaya a·doko BJP-ni bang·bata dilgiparangan toromigipa Kristianrangan ong·a ine janapatskaengon, ia dilgiparang pangnan Kristianrangni nangan somoirango bakrimenggipa dolrang baksa ku·rangko on·aigen ineba Shullai aganaha.
