SHILLONG: Bangbanggipa me·dik jekai doko gam·a, apsan daken Voice of the People’s Party (VPP) dolba ong·a ine Budbar salo, National People’s Party (NPP)-ni national general secretary aro a·dokni Deputy Chief Minister Sniawbhalang Dhar, Shillong songjinmani Malki kal·chakramo, Shillong Parliamentary constituency-ni NPP candidate Ampareen Lyngdoh-na campaign ka·engmiting somoio matnangataha.
“Social media-rangode an·ching VPP-rarakosa nikna man·aigen indiba anga na·simang iako aganenga, bangbanggipa me·dikrangba dokode gam·bata,” ine Dhar aganaha.
Batanggimin bilsirango VPP-ni president Ardent Miller Basaiawmoit, UDP aro HSPDP dolrangoba napaha aro 2019 bilsio Congress dolna campaign ka·engmiting somoio ‘regional party-rangde election-ni somoirangosan nadopaaia’ ine aganahachim ine janapatengon, “Iandake dolsaoni dolsaona katjojogipa dilgipako manderang maikai bebera·na man·gen?” ine Dhar sing·doataha.
Manderangoniko tangka paisa gile ra·a ine VPP-ko matnangatengon, “Tangka paisa dongjani gimin uamang Jaintia Hills-o tom·aniko ong·ate, baltino manderangoniko tangka gilaha aro ia apsan dolan da·o tangka paisa jakkalsretaniko bon·atna ku·rachakskaenga,” ine NPP-ni national general secretary matnangataha.
VPP-ni president Ardent Basaiawmoit, maiko songsalna on·gilpaaha ine sing·doatengon, “VPP president-ni on·gilpaanian Meghalaya a·doko me·chikrangna on·gimin bilko me·asarangna on·skana miksonganisa ong·a. An·chingni songsalo pagipani bimingko dedrangna on·aniara an·tangtangni skani gita ong·na man·ama? Ian me·chikrangni bilko ra·sekna jotton ka·ani ong·jaengama?” ine Dhar matnangataha.
2023 Assembly election-o vote man·aniko hisape aro ia election-na skang dingtang dingtang dolni dilgiparang NPP-o napahani gimin Shillong Lok Sabha seat-ko NPP-ni candidate chegen ineba ua an·tangni ka·dongchakenganiko parakataha.
“2023 bilsini Assembly election-o NPP, lak 3.20 vote-rangko man·aha aro ia election-na skang dingtang dingtang dolni dilgiparang NPP baksa bakrimahani gimin lak 1.38-mangni gita vote-rangkode chinga man·dapaha. Uni gimin NPP-ni man·enggipa chu·gimik vote-rangara lak 4.45-mangni gita ong·enga aro ian Shillong parliamentary seat-ko chena gita chu·ongaha,” ine NPP-ni general secretary aganaha.
Ia Lok Sabha election-o BJP-ba NPP-na chakpaaniko on·engani gimin NPP-ni candidate, BJP-ni vote-rangkoba man·dapkugen ineba Dhar parakataha.
