SHILLONG: Sukrobar salo, Lok Sabha election-ko ong·atanio Meghalaya a·dokni Lok Sabha constituency damgni, chong·motan Shillong aro Tura Lok Sabha constituency damgnion bilsi 18 gape skanggipa changna pu·ongipa chadamberangba bang·en bak ra·angtokaha aro seokako man·gipa MP-rang, a·doko lekka poraniko tang·doatna gita kam ka·gen ine an·tangtangni ka·dongchakenganiko parakattokaha.
Skanggipa changna pu·ongipa chadambe sakgnio sing·sandie nion, a·doko seokako man·gipa MP-rang aro ma·mongo rikna sienggipa gital sorkari, lekka porani gadangko tang·doatna aro chadamberangna janggi tangani cholrangko on·na kam ka·gen ine an·tangtangni ka·dongchakenganiko parakattokaha.
A·songni namroro silroroanina dilgipako seokanio chadamberangba gisiko nange bak ra·na nangenga ineba ia chadambe sakgni aganaha.
Batanggimin chang Parliamentary election-rangko ong·ataniode chadamberangni pu·onanirang namen komibatrongachim indiba ia changode chadamberangoniba bang·batan dilgipako seokanio bak ra·angtokahachim.
Ia chang Lok Sabha election-o chadamberangkosan ong·aigija butchuma budeparangoniba bang·batakon polling station-rango bak ra·aniko nikangna gita man·aha.
Bilsi 85 batgimin manderangnade adita salrangna skangsan, noktangtango pu·onataniko dakangahachim.
Bilsi 60 aro una batgimin manderangnaba polling station-rango dingtangmancha cholrangko on·aha aro bilsi 60 batgimin manderangde riting dakna nanggijan pu·onna gita man·aiahachim.
Re·na man·gijagipa manderangnade polling station-rango dakchakgiparangko aro wheelchair-rangkoba Election Commission on·skaahachim.
Lekka porako namdapatgen ine skanggipa changna pu·ongipa chadamberang ka·dongenga
Date:
Share post:
