TURA: Re·anggipa Sonibar attamchibara, Tura-ni Balonggre jolo, scooty bolsako dumper truck bolsa salgake a·sel ong·aha aro ia a·sel ong·anio scooty-o re·angenggipa me·chik bi·sa sakgni, bilongbee saknaanirangko man·na nangaha.
Koborko on·ani gitade, ia a·sel ong·ani somoio me·chik bi·sa sakgni, Balonggre-oni Dakopgre jolchipakna scooty sale re·angengachim indiba ICFAI University sambao uamangko, ta·rakbee re·baenggipa dumper truck bolsa su·tingeaha.
Truck garichi salgakako man·e me·chik bi·sa sakgnioni saksade ja·a be·na gita nangaha aro sakgipinba aditan saknaanirangko man·na nangaha.
Ia dumper truck gari, jeni nombor-an ML-08H 8587 ong·achim, ian saksa Moni Bhowmik minggipa mandeni gari ong·achim aro ia gariko Hajidul Haque minggipa mande salengachim.
A·sel ong·ani ja·man truck gariko salgipa mande, ua biaponi kataha.