TURA: Re·anggipa Sukrobar salo ong·atanggipa Lok Sabha election-na skang, Congress dolni candidate Saleng A Sangma-ni jongsarigipa, jean be·enni gita cholgri ong·achim, ia me·a bi·sani gitoko NPP-ni ba·rako wenenba ‘ua NPP-na pu·ongen’ ine aganatna jotton ka·ahani gimin NPP-ni membor Kritenbirth Marak-ni kosako Jaynie Ningring N Sangma, Tura Police Station-ni Officer-in-Charge (OC)-na FIR ka·doangaha.
Iani bidingo NPP membor-ni kosako FIR ka·doangengon, “NPP-ni dilgipa Kritenbirth Marak, be·enni gita cholgri ong·gipa bi·sa Milam N Sangma-ni gitoko NPP-ni ba·rako wenenba ‘ua sana pu·ongen’ ine sing·e an·tangan NPP-na pu·ongen ine aganenba ia video-ko ua social media-o watataha. Uni iandakgipa kamara angni grigipako chonnike roasan ong·aigija, ia bi·sako ong·gija dake politics kal·anio jakkalna miksonganiko mesokani ong·aha,” ine Jaynie Sangma parakataha.
Kal·ake roako man·gipa Milam Sangma-ra Saleng-ni gitcham jikgipani jonggipa ong·achim aro ia obostani video-ko social media-rango niksoani ja·man Nengminja Maharisan ong·aigija Garo Hills-ni bang·bata biaprangon manderang, NPP-ko dilenggipa mandeni kamko jegalattokahachim.
Be·enni gita cholgri ong·gipa bi·sako iandake kal·ake roaniara Rights of Persons with Disabilities Act 2016-ni ning·o be·enni gita cholgri ong·gipa manderangna on·gimin bilko pe·ani gita ong·aha ine janapatengon, NPP-ni dilgipa Kritenbirth Marak-ni kosako rakgipa ja·kurangko de·china aro dongimin niamrango pangchake uko rim·china gita Jaynie Sangma, FIR-o police-rangko didiataha.
Ia obosta ong·aniara April-ni 18 tarik attamo, Lok Sabha election-na salsa skangmangmangsa ong·ahani gimin ian election-na dongimin Model Code of Conduct (MCC)-ko pe·ani ong·aha ineba Sangma, FIR-o parakataha.