TURA: Dal·dalgipa truck garirang, mongsongbate ro·ong salgipa dumper truck garirangni skatang salanichi ramarango bang·en a·sel ong·anirangko aro manderangni so·ota man·anirangko nikna man·rongengani gimin Tura jilla aro uni wilwilao pring 7:00 bajioni attam 7:00 bajionade dal·dalgipa truck garirangko napna on·jachina Garo Hills-ni GSU, FKJGP, AYWO, ADE aro FAF dolrang, West Garo Hills a·jani Deputy Commissioner-ko didiataha.
Adita salrangna skangsan, Tura-ni Balonggre jolo, me·chik bi·sa sakgnini scooty-o re·angengmiting somoio ta·rake salbaenggipa dumper truck gari bolsa, uamangko salgakenba, me·chik bi·sa sakgniko bilongbee saknaatahachim. Iandake a·sel ong·anio me·chik bi·sa saksade ja·a samsa be·na gita nangahachim.
Iana skangba, Garo Hills-ni dingtang dingtang biaprango, ro·ong salruragipa dumper truck garirangni skatang salanichi bang·en a·sel ong·anirangko aro manderangni sina nanganirangko nikna man·ahachim.
“Uni gimin gipin dal·dalgipa songjinmarang, jekai Shillong, Guwahati aro uandakgipa songjinmarango ja·rikenggipa niamo pangchake Tura jillaona iandake dal·dalgipa truck garirangko Tura songjinmao napna gita somoiko donna nanga aro iandakgipa garirangko pring 7:00 bajioni attam 7:00 bajionade Tura jillao re·napbana on·jachina chinga didienga,” ine NGO-rang parakataha.
Tura jilla ta·raken dal·rorobaengani gimin dal·dalgipa truck garirangni re·ruraaniko bilakbate nirok sandichina didiatengon, Baghmara, Dalu aro Chokpot jolchipakni re·baenggipa truck garirangko Darengre-o champengsochina, Paikan, Krishnai, North Garo Hills aro East Garo Hills-chipakni re·baenggipa truck garirangko Rongram-o champengsochina aro Mankachar, Phulbari aro South West Garo Hills a·jachipakni re·baenggipa truck garirangko Damalgre-o champengsochina gita NGO-rang didiataha.
A·sel ong·anirangko komiatna man·na gita truck garirangni ta·rakdugae salaniko aro nangana bate bostu salaniko bilakbate nirokchina gitaba NGO-rang didiataha.
Indake ong·engon, iandake truck garirangni skatang salanichi a·sel ong·anirangko chagrongna nangenggipa manderangna aro uamangni nokdangrangna administration-ni gita tangka paisarangko gamchinaba NGO-rang dabiangaha.