SHILLONG: Election-ni somoirango dingtang dingtang political dolrang, manderangko togina man·jana gita Sixth Schedule, District Council aro a·doko songdongenggipa Tribal-rangni daka rikanirangkoba skulni curriculum-o napatchina gita a·dokni BJP dol, Meghalaya sorkariko didiataha.
“Sixth Schedule aro District Council-rangna on·gimin bilrang baksana Sixth Schedule a·ja ning·o songdongenggipa Tribal manderangni daka rikanirangkoba skulni curriculum-o napatchina anga a·dok sorkariko didienga. An·chingni chatro chatrirang aro bi·sarangba an·chingna on·gimin bilrangni gimin ma·sie ra·na nangchongmota,” ine BJP-ni state vice president aro Tura-ni MDC Bernard Marak parakataha.
Marak-ni parakatani gitade, a·songna on·gimin niamrangde salgro salaram jolrangna aro Meghalaya a·dokni Sixth Schedule a·jarango nangegipa ong·jachim aro iani bidingo manderang, mongsongbate chadamberang jajaataniko man·tokengachim.
“Election-ni somoirango pangnan political dolrang, a·songna on·gimin niamrangchi Sixth Schedule a·jarangoba kenjagokataniko ra·bana jotton ka·ronga aro election-rang bon·angahaoba manderangni kenanirangde bon·chipjaenga,” ine Tura-ni MDC parakataha.
Sixth Schedule a·jarango nangegijagipa niamrangni gimin pangnan political dolrang, election-ni somoirango BJP-ko matnangronga ine janapatengon, “Sixth Schedule a·jarangode CAA-ara maming nangchakeani dongjachim indiba election-ni somoio political dolrang, iakon Garo Hills-o politics kal·na jotton ka·skaaha. Mitam dilgiparang, CAA-ko ka·namgijagipa niam ine mesokaha indiba Sixth Scheduled a·jarangode CAA-ara nangchakeani dongjawachim,” ine Marak talataniko on·angaha.
Meghalaya aro salgro salaramni gipin a·dokrangna Constitution-ni dingtang dingtang niamrangchi chel·chakaniko on·a ineba ua parakataha.
“Songadam nokadamrango aro mongsongbate salgro salaram a·dokrango namroro silroroaniko ra·bana gita ma·mong sorkarin miksonganiko manderang ma·sijachina gita pangnan gipin political dolrang, toromni gita manderangko bringbrangate BJP-kosa matnangna jotton ka·ronga indiba kakketko niatgenchimode iandakgipa niamrangko watanichi Tribal-rangna nangchakeani dongjana gitasa BJP kam ka·engachim,” ine BJP-ni state vice president parakataha.
