EGH-o Assam-ni mande sak 3-ko so·otanina jegale Wageasi-o jinma tom·bimonga

TURA: Adita salrangna skang, East Garo Hills a·jani Rongmil jolo, Assam-ni mande sakgittamko ka·saninggija dake so·ote galanina jegalenba Sombar salo, North Garo Hills a·jani Wageasi jolo songdongenggipa manderang jinma tom·bimonganiko ong·atangaha aro ia tom·anio dingtang dingtang dolrang aro jolo songdongenggipa bang·bea manderangba bak ra·angtokaha.
Assam-ni chadambe sakgittamko ka·saninggija dake so·ote galanina dos dakgipa manderangko jegalatengon, ia a·sel ong·aniko badiaba badiaba YouTube news channel-rango Wageasi-o ong·aha ine janapahani giminba songni manderang aro jolni dingtang dingtang dolrang raken jegalatenba, iandake social media-rango ong·gija on·gipa koborrangko ra·galpilchina gita dabiangtokaha.
“Ia a·sel ong·aniko Wageasi-o ong·aha ine badiaba badiaba news channel-rango seahani gimin chinga indakgipa kamrangna namen suk ong·ja aro iandakgipa news channel-rangko raken jegala. Ia a·sel ong·gipa biapara East Garo Hills a·jani Rongmil jolosa ong·ode maikai Wageasi-o ine uamang koborko on·aha. Ia song damgnini chel·grikaniko nichengbo,” ine tom·anio bak ra·gipa manderang raken jegalattokaha.
Indake ong·engon, ia mande sakgittamko so·ote galanio jak donggipa manderangko ta·raken rim·china aro niamo pangchake sastirangko on·china gitaba ia tom·bimonganio Wageasi jolo songdongenggipa manderang aro dingtang dingtang dolrang dabiangtokaha.