TURA: Adita salrangna skang, East Garo Hills a·jani Rongmil jolo, Assam-ni mande sakgittamko so·ote galangahani gimin Rongjeng-ni dingtang dingtang NGO-rang, jekai GSU, FKJGP, AOSW, ASWA, AAYF, NGCO, APA aro uandakgipa dolrang, April-ni 22 tariko apsan tom·aniko ong·atangenba, ia a·selko raken jegalataha aro so·ota man·gipa mande sakgittamni nokdangrangna kalimpaanikoba parakattokaha.
Re·anggipa April-ni 16 tariko, Assam-ni mande sakgittamko ma·sina man·kugijagipa manderang wa·alchi so·chipenba, Rongmil jolo donggipa buring damsao gope galangahachim.
Ia a·sel ong·ani ja·man, mitam manderang social media-rango kenjagokatani kattarangko aro video-rangko watanichi a·dok damgnini gisepo ding·chaogrikatanirangkoba ra·bana jotton ka·ahachim.
Ia mande sakgittamko ka·saninggija dake so·ote galahani gimin Rongjeng-ni NGO-rang suk ong·gijaniko parakatengon, a·dok damgnini gisepo maming so·sojengjeng ong·anirang aro ding·chaogrikanirang dongjana gita social media-rango tol·pinapgipa kattarangko aro video-rangko watjachina gita manderangko didiataha.
“Ia obosta ong·na kragija ong·aha aro ia a·selni bidingo police-rangko kakketko ma·sina gita da·o am·sandienga. Uni gisepon mitam manderang social media-rango ong·gija ba kragija kattarangko post ka·anichi a·dok damgnini gisepo ding·chaogrikaniko ra·bana jotton ka·enga indiba iandake social media-rango skatang post ka·anirangara a·dok damgnini gisepo so·sojengjeng ong·ataniko ra·bana man·gen. Uni gimin ia a·selni bidingo skatang social media-rango post ba comment-rangko ka·jachina chinga didiatenga,” ine Rongjeng-ni bakrimgimin dolrang parakataha.
Assam aro Meghalaya a·dok damgnini manderangan bading chiwalani aro dingtang dingtang kamrangna re·grik dogrikna nangani gimin a·dok damgnini gisepo tom·tome donganiko nangchongmota ineba Rongjeng-ni NGO-rang parakataha.
Mikkangchi iandakgipa a·selrang ong·taijana gita sorkarini bilo ong·enggipa manderang baksa bakrime kamrangko ka·anggen ineba Rongjeng-ni NGO-rang parakataha.