SHILLONG: Meghalaya State Commission for Women (MSCW)-ni gital chairperson-ko sorkari songe on·ningjaengani a·sel dingtang dingtang kamrangko ka·anio neng·nikanirangko chagrongna nangenga ine commission-oni kobor on·aha.
“MSCW-ni gital chairperson-ko songe on·ningjaenganiara a·dok sorkarini commission-na gisik nanggijaniko mesokanisa ong·enga. Gipin a·dokrangode chairperson-rangko antignini gisepon songrongaiachim,” ine Commission-oni kobor on·timgiparang parakataha.
MSCW-ni gital chairperson-ko songanio sorkari baditaba antirangni gisepon kamrangko matchotgnok ine adita salrangna skangsan, a·dokni Social Welfare Minister Paul Lyngdoh parakatahachim.
Indake ong·engon, MSCW-ni gital chairperson-ko songanio somoi ra·chae dongengani gimin Voice of the People’s Party (VPP)-ba a·dok sorkariko matnangataha.
“Women’s commission-ni chairperson-ko songanio a·dok sorkarini ta·rake kamko ka·jaenganiara namen kragijani ong·enga. A·dokna maming namgni ong·gijagipa political dilgiparangkode sorkari ta·raken dingtang dingtang kamrango rakkina man·a indide maini gimin MSCW-ni chairperson-ko songanio indita somoiko nangskaenga?” ine VPP-ni ku·wattimgipa Batskhem Myrboh, a·dok sorkariko sing·doataha.
Meghalaya a·dokni dingtang dingtang biaprango me·chikrangko drae til·ekanirang aro kragija dakanirangna an·tangni suk ong·gijaniko parakatengon, MSCW-ni chairperson-ko songe on·ningjaengani a·selan iandake kal·aka man·gipa me·chikrangni namgnina kamrangko ka·anio commission neng·nikanirangko chagrongna nangenga ine Myrboh parakataha.
MSCW-ni dilna gita a·doko u·i-ma·sigipa me·chikrang dongjama ine a·dok sorkariko sing·doatengon, “Ian sorkarini mongsonggipa daitoara banobasa aro sorkariko chalaianio ong·ja ine mesokani ong·a,” ine VPP-ni dilgipa matnangataha.
