SHILLONG: West Khasi Hills a·jako 1976 bilsion Khasi Hills District-oniko bak dakenba gitchambatsranggipa district ba a·jarangoni damsa ong·engoba ia a·jao lekka porani gita tang·dopana man·jaenga ine Khasi Students Union (KSU) Nongstoin circle parakatenba, West Khasi Hills a·jao lekka porako tang·doatna gita dingtang dingtang nanganirangni gimin a·dokni Education Minister Rakkam A Sangma-na sedoataha.
West Khasi Hills a·jao higher education ba chubata gadangni lekka poraniko on·gipa college-rang, mongsongbate sorkari college-rang dongkujaengani a·sel chatro chatrirang gipin biaprangonasa re·ange poraina gita nangtokenga ine janapatengon, ia neng·nikaniko namatna gita West Khasi Hills a·jao sorkari college damsako kulidape on·china KSU Nongstoin circle-ni president Willbest Wanniang, Education Minister-ko didiataha.
Nongstoin-ni Mawrusyiar-o Nongstoin Polytechnic-ko kulina gita 2017 bilsion pangchakaniko songe on·ahachim ine janapatskaengon, chatro chatrirangni namgnina ia polytechnic-ko ta·raken matchotatenba, kulie on·china KSU, Education Minister-ko didiataha.
1976 bilsio kuligipa Sibsingh Memorial Govt Higher Secondary School-ni gimin janapatskaengon, ia skulo Science aro Arts stream-san dongaiani a·sel commerce stream-ko poraina sikenggipa chatro chatrirangde ia skulo poraina chol ong·jaenga ine ia skulo commerce stream-koba a·bachengatchina KSU-ni president, Education Minister-ko didiataha.
Indake ong·engon, Nongstoin-ni ITI-o gipin jakni kamrangkoba skie on·china aro Nongstoin-ni District Institute of Education & Training (DIET)-o seat-rangko bariatchina gitaba KSU, a·dokni Education Minister-ko didiataha.