SHILLONG: Wachikarini mikka bitchi somoi gita ga·akode a·dokni manderang ia changde load shedding-oni rang·spena man·naba donga.
Meghalaya-o da·oni bijolini obosta namkalen dongenga ine MeECL Chairman cum Managing Director (CMD), Sanjay Goyal Butbaro aganaha.
Bilsirikkit load shedding ka·ako chanchiatgenchimode a·doko da·o dipetode bijoli siatani dongkjaenga ine Goyal aganaha.
“Umiam-ni chirangko chinga tik ong·e rakkina jotton ka·enga, unigisepon somoi gita mikka-chimarang waode, jedake May-ni bon·kamgipa anti ba June-ni skanggipa antirango wagenchimode, da·oni chini obostarangko niatora load shedding ka·na nangejasusu nikenga,” MeECL CMD aganaha.
On·tisa mikka-balwa rakbaon bijoli siataini gimin manderangni matnanggipani bidingo sing·on, manderang corporation chalaienggipa kolrangni bidingo ma·chichakna nanggen, Goyal aganaha.
Uni aganani gitade, mikka-balwa rakmitingo bijoliko siatani ja·pangde, bijoli slitingrango bolrang be·jetna, cheksirang ga·akdapna ugita dingtang dingtang kenchakanirang gimin bijoliko siatna nangao ga·aka ine Goyal aganchakaha.
Unomitingo re·roroe nirokgipa linemen aro electrical staff-rangni nirokani ja·mansa bijoliko watpiltaienga aro iako dakaniara mande jatni naljokgninan ong·a, MeECL CMD aganaha.
Ua indakeba aganaha je goera gopretna kenchakgipa biaprangba donga jeni a·selan MeECL-ni bang·a transformer-rang nosto ong·jok, mongsongbate Ri Bhoi aro West Khasi Hills a·jarango bilongbata, Goyal aganaha.
