TURA: Re·anggipa April-ni 16 tariko, South West Garo Hills a·jani Gandhipara songo ong·atgipa Chenga Benga Mela-ona re·anggipa me·chik bi·sa sakgniko chadrape til·ekdragipa mande saksniko police-rang rim·na man·aha ine u·iataha.
Police-rangni u·iatani gitade, ia a·selni bidingo skanggipa mandeko police-rangni rim·ani ja·mano ua, ia a·selo jak donggipa gipin manderangkoba biming minge on·aha aro uandaken ia dos dakgipa manderangko police-rang, Assam a·dokni South Salmara a·jao donggipa apsan songonikon rim·na man·aha.
Ia mande saksniko rim·ani ja·man kachariona rimangaha aro kachari ia manderangko salsnina police-rangni ning·o donchina rai on·ataha.
Re·anggipa April-ni 16 tariko, me·chik bi·sa sakgni, an·tangtangni ripeng sakgni baksa South West Garo Hills a·jani Gandhipara songo ong·atanggipa Chenga Benga Mela-ona re·angahachim.
Skanggipao, me·chik bi·sa saksa an·tangni me·asa ripeng baksa, mela-ko ong·atenggipa biaponi adita chel·kala biapona re·angon, ua biapo dolsa manderang uamangko timsoenba chadrapsoaha aro me·asako siboke dokani ja·man me·chik bi·sakoba doke sibokataha. Me·chik bi·sa sibokani ja·man, ia manderang me·chik bi·sako kragija dake kal·aka aro me·chik bi·sa sibokani a·sel ia manderangko ma·sirikjaha.
Iani ja·mano, sakgipin me·chik bi·saba, an·tangni me·asa ripeng baksa apsan biapona re·angon, uano ia apsan manderangan dongsoenba me·asa bi·sako kae dokaha aro me·chikkoba ia manderang kragija dake dokaha ine police-rang u·iataha.
Police-rangni u·iatani gitade, me·chik sakgnikon drae til·ekaha ine matnangtokahaoba medical-ni gita porikka ra·aniode me·chik saksakosan drae til·ekaha ine ma·sina man·ahachim indiba me·chik sakgni aro uamangni me·asa sakgnikoba ia manderang, bilongbee dokahachim.