SHILLONG: 2023 bilsini September jao, Shillong songjinmani Nongthymmai gittimo me·chik saksako drae til·ekgipa manderangni kosako bakan charge sheet ka·gen ine police-rang parakataha.
East Khasi Hills a·jani Superintendent of Police (SP) Rituraj Ravi-ni parakatani gitade, ia me·chikko drae til·ekgipani bidingo police-rang, chu·onga gitan sakkirangko aro video-rangkoba man·ahani gimin dos dakgipa manderangni kosako bakan charge sheet ka·na man·gen ine ka·dongenga.
“Dongimin somoi gitan chinga ia manderangni kosako charge sheet ka·na ka·dongenga,” ine SP aganaha.
Koborko on·ani gitade, ia a·sel re·anggipa 2023 bilsini September jaon Shillong songjinmani Nongthymmai gittimo ong·ahachim aro ua somoio sakbri manderang, me·chik saksako sam pekatenba, drae til·ekaha aro video-koba ka·e ra·ahachim.
Ia a·sel ong·ani video-ko gipatani ja·man kal·ako man·gipa me·chik an·tangan police-rangona re·ange, dos dakgipa manderangni kosako FIR ka·doangaha aro police-rang, iani bidingo chadambe saksako man·chape gimik sakbri manderangko rim·aha.
Police-rangni kobor on·ani gitade, rim·ako man·gipa mande sakgittamara bilsi 20 ong·gipa Modify Dkhar, bilsi 20 ong·gipa Trustful Dkhar aro bilsi 18 ong·gipa Emkilang Shyrmang ong·achim indiba saksade bilsi sokkugijagipa chadambesa ong·achim.
Indake ong·engon, ia a·sel ong·ani video-ko gipatani gimin Hynniewtrep Integrated Territorial Organisation (HITO)-ni dilgiparang raken jegalataha aro ia me·chikni gunko nosto ka·asan ong·aigija uni janggina kenchakna nanganikoba ra·baani gita ong·aha ine parakataha.
Iani bidingo HITO-ni dilgiparang, East Khasi Hills a·jani SP-na badi ka·eba sedoataha aro dos dakgipa manderang baksana video-ko viral ka·enggipa manderangni kosakoba rakgipa ja·kurangko de·china didiataha.