TURA: Garo Hills-o aro mongsongbate Tura jillao dal·dalgipa truck garirang aro dumper truck garirangni skatang salenganichi a·sel ong·anirang batroroengani gimin iandakgipa truck garirangko Tura jillao napna on·jachina dabie Sombar salo Garo Hills-ni dingtang dingtang NGO-rang, chong·motan GSU, FKJGP, ADE, AYWO, FAF, GHULU aro uandakgipa dolrang, Tura-ni DC office gate sambao asonge jingjengataniko dakangaha.
Robibar salosan, dumper truck gari bolsa ta·rakbee salangenba, Tura-ni Matchikol jolo bike bolsako salgakeahachim aro ia a·sel ong·anichi bike-ko salgipa mandeni ja·a samsa be·na gita nangahachim.
Iana skang Tura-ni Ballonggre joloba apsan dakgipa dumper truck garian, scooty bolsako salgake, me·chik bi·sa sakgniko saknaatahachim. Ia me·chik bi·sa sakgnioni saksade ja·a samsako gimaatna gita nangahachim.
Indake ong·engon, dumper truck garirangni skatang salenganichi manderangna kenchakna nangani ong·enga ine NGO-rang parakatenba, truck garirangko Tura jillao napna on·jachina District Administration-o dabiangtokaha.
A·sel ong·anio saknaa man·gipa manderangna gari nokgiparang an·tangtangan compensation-ko gamchina aro hospital-o sanna banani korosrangkoba gamchina gitaba NGO-rang dabiangaha.
Ja·mano West Garo Hills a·jani Deputy Commissioner Jagdish Chelani, NGO-rangko re·bae grongenba, gari gorarangna dongimin niamrangko mesoke on·angaha aro iandake niam pe·gipa garirangni kosako rakgipa ja·kurangko de·na gitaba NGO-rangna ku·rachakaniko on·ataha.
Deputy Commissioner-ni gronge agangrikangani ja·man NGO-rangni jingjengataniko dontongatpilaha.
Jingjengataniko dontongatani ja·man kobor ra·timgipa manderang baksa agangrikengon, iandakgipa a·selrangko chel·chakna gita pangnan traffic-ni niamrangko ja·rikchina gita NGO-rang, gari gora jakkalgipa manderangko didiatskaaha.
Dumper garirangko Tura jillao napna on·jachina dabie NGO-rang jingjengata
Date:
Share post:
