SHILLONG: Meghalaya State Reservation Policy (SRP)-ni bidingo a·doko songdongenggipa manderangni agan-ku·pattianirang aro chanchianirangko ra·na gita Justice (Retd) Mool Chand Marg-chi dilna gita songako man·gipa Expert Committee, dingtangmancha public notice ba jinmana u·iataniko on·na tik ka·angaha.
Expert committee-ni tom·aniko re·anggipa Sonibar salo, Shillong songjinmao ong·atangaha aro ia tom·anio, committee-ni gipin dilgiparang, chong·motan Justice (Retd) Dr Satish Chandra, Prof DV Kumar, Prof Chander Shekhar, Prof Subhadip Mukherjee aro Personnel department-ni gipin membor-rangba bak ra·angaha.
SRP-ni bidingo manderangni agan-ku·pattiani aro chanchianirangko ra·na gita dingtangmancha public notice-ko on·na ia tom·anio committee tik ka·angengon, Shillong songjinmao aro dingtang dingtang a·jani headquarter-rangoba public hearing-rangko ong·atna tik ka·angjolaha.
Expert Committee-ni changgipin tom·aniko re·baenggipa May jao ong·atna gitaba ia tom·anio tik ka·e donangaha.