TURA: Adita salrangna skang, South West Garo Hills a·jani Garobadha samba jolo donggipa Gandhipara songo, Chenga Benga Mela-ona re·anggipa me·chik sakgniko chadrape til·draanina rim·ako man·gipa manderang da·o gimik saksku gapaha ine police-rang u·iataha.
Police-rangni u·iatani gitade, rim·ako man·gipa manderang gimikan a·sel ong·gipa biap sambao donggipa Assam a·dokni Teporpara songoni ong·achim aro ia manderangko South West Garo Hills a·jani police-rang, Assam a·dokni South Salmara District Police baksa nangrime rim·na man·aha.
Rim·a man·gipa saksku manderangoniko police-rang, mobile ge 7-koba rim·aha ine u·iataha.
Police-rangni am·sandie man·ani gitade, dos dakgipa manderang, mande saksaoniko mobile phone-koba ra·sekaha aro sakgipin mandeoniko tangka dabie ra·na gita ka·mikkenatahachim.
Iani bidingo police-rang minggni case-ko ka·enba, sandirokanirangko dakengkua ine u·iataha.
Ia a·sel ong·anio dos donggipa gipin manderangkoba rim·kugen ine ku·rachakaniko on·atengon, iani bidingo saoba maiba u·iatna nanganirang donggenchimode police-rangna u·iatna man·gen aro u·iatgipa mandeni bimingko police-rang parakgija donaigen ine South West Garo Hills a·jani SP Vikash Kumar parakataha.
Re·anggipa April-ni 16 tariko, me·chik bi·sa sakgni, an·tangtangni ripeng sakgni baksa South West Garo Hills a·jani Gandhipara songo ong·atanggipa Chenga Benga Mela-ona re·angahachim.
Skanggipao, me·chik bi·sa saksa an·tangni me·asa ripeng baksa, mela-ko ong·atenggipa biaponi adita chel·kala biapona re·angon, ua biapo dolsa manderang uamangko timsoenba chadrapsoaha aro me·asako siboke dokani ja·man me·chik bi·sakoba doke sibokataha. Me·chik bi·sa sibokani ja·man, ia manderang me·chik bi·sako kragija dake kal·aka aro me·chik bi·sa sibokani a·sel ia manderangko ma·sirikjaha.
Iani ja·mano, sakgipin me·chik bi·saba, an·tangni me·asa ripeng baksa apsan biapona re·angon, uano ia apsan manderangan dongsoenba me·asa bi·sako kae dokaha aro me·chikkoba ia manderang kragija dake dokaha ine police-rang u·iataha.
Police-rangni u·iatani gitade, me·chik sakgnikon drae til·ekaha ine matnangtokahaoba medical-ni gita porikka ra·aniode me·chik saksakosan drae til·ekaha ine ma·sina man·ahachim indiba me·chik sakgni aro uamangni me·asa sakgnikoba ia manderang, bilongbee dokahachim.
