SHILLONG: Adita salrangna skang, a·dokni Deputy Chief Minister Sniawbhalang Dhar-ni nokko ma·sina man·gijagipa manderangni petrol bomachi godapahani gimin BJP-ni MLA Sanbor Shullai, raken jegalataha.
Manderangni gisepo iandake kenjagokataniko ra·bana jotton ka·aniara namen kragijani ong·a ineba Shullai parakataha.
Iandake jingjengatanirangna aro so·sojengjeng ong·atanirangna bame on·jachina gita sorkariko didiatengon, mikkangchi a·doko obostarang namjabatangna skang, iandake so·sojengjeng ong·atgipa manderangni kosako rakgipa ja·kurangko de·china Shullai didiataha.
“Songsalo iandake mitchigrikani kamrangko BJP chakchikchajawa. Darangni torom ki·taprangoba aro darang toromba dosgri manderangni janggiko ra·china didiani dongja. Police-rang an·tangtangni kamko ka·china aro duko ga·akenggipa manderangna kakket bichalko on·na gita niam chu·sokchina. Iandake songsalna ong·gija kamko ka·enggipa manderangna darang dolrangba chakpaaniko on·na nangja,” ine BJP MLA parakataha.
Shullai-ni parakatani gitade, Tribal manderang, Indian Constitution-ni Sixth Schedule ning·o chel·chakako man·giparang ong·ani gimin tol·e on·gipa manderangko bebera·na gita nangja.
India a·songara democratic a·songsa ong·ani gimin pilak kamrangkon ka·na gita jakgitel ong·a indiba jingjengatanirangko dakengon pangnan tom·tomesa dakna nanga aro darangnaba saknaatanirangko ra·bana nangja ineba Shullai parakataha.
Meghalaya a·doko so·sojengjeng ong·anirangko champengna man·na gita Opposition dolrangko man·chape pilak political dolrangkon ku·cholsan ong·e kam ka·china gitaba BJP MLA didiataha.
