SHILLONG: Tura Lok Sabha constituency-o Trinamool Congress (TMC)-ni bang·a vote-rang bon·kamgipa somoio Congress-ona re·angaha ine National People’s Party (NPP) a·kangataha.
Tura Lok Sabha seat-ko NPP-ni candidate aro Tura-ni Lok Sabha MP Agatha Sangma chepiltaigen ineba NPP a·kangatskaaha.
“Lok Sabha election-ni bon·kamgipa somoio TMC-ni bang·a voter-rangan Congress-ona re·angtokaha indiba NPP-ni vote-rangde apsan ong·e dongaiahani gimin chinga ia changoba chepiltaina ka·dongenga. Chingni mitam vote-rang gipin dolrangchi re·anggenchimoba, gipin dolrangoni chingona re·bagiparang bang·batskaaha,” ine a·dokni Cabinet Minister aro Phulbari-ni NPP MLA AT Mondal aganaha.
Shillong Lok Sabha constituency-ni giminde ua mamingkoba aganna man·kujawa ine janapatskaengon, Tura seat-kode NPP-ni Agatha Sangma chepiltaigen ine Mondal, an·tangni ka·dongchakenganiko parakataha.
“Khasi aro Jaintia Hills-ni giminde anga bang·e ma·sija indiba election-o chinga name dakaha inesan anga ma·siaia,” ine ua aganaha.
Tura Lok Sabha seat-ko badita vote-rangchi chena ka·dongenga ine sing·on, “Da·o dipet iako aganna man·kujawa indiba cheronggipa vote-rangchin chinga chena ka·dongenga. Election-ode an·ching bang·a vote-rangchi chenasa nangnikbata indiba vote ge·sachi chegenchimoba uan chea ong·aha,” ine Phulbari-ni NPP MLA aganaha.
 |
ReplyForward
|