Simsang chibimaoniko niam gri an·cheng kitenga: APA

TURA: East Garo Hills a·jani Samanda Kakwa songo donggipa Simsang chibimaoniko, MP Agarwal Pvt Ltd Company, niam gri an·chengrangko kitenga ine A·chik Progressive Approach (APA) dol parakatenba, iani bidingo Simsanggre Forest Range-ni District Forest & Environment Officer-na badi ka·e sedoataha.
APA-ni president Francis Marak-ni parakatani gitade, adita salrangna skangsan ia apsan company-kon Bangon chiringoniko niam gri an·cheng kitanina APA, mikrakataniko on·angahachim indiba ia company, Garo Hills-ni dingtang dingtang biaprango PMGSY ramarangko tarina gita da·o Simsang chibimaoniko niam gri an·cheng kitskaengachim.
“Simsang chibimara Garo Hills-o dal·batsranggipa aro bakrobatsranggipa chibima ong·a aro ia sal somoirango manderang china dilna gita nangengon, Garo Hills-o mongsonggipa chibimakon iandake nisie galaniara Garo Hills-ni manderangna namen dukni katta ong·enga. Ia company, dal·dalgipa ostrorangko ra·bae, ia chibimaoniko an·cheng kitengani a·selan ia chibima ta·raken nosto ong·atako man·engaha,” ine Marak parakataha.
APA president-ni u·iatani gitade, ia company-o an·cheng kitna gita maming licence ba lekkarang dongjachim indiba Samanda Kakwa songo donggipa Simsang chibimaoniko niam gri an·chengrangko kitskaengachim.
Chokpot joloba apsan daken, chiring chibisikrangoniko niam gri an·cheng kitahani gimin ia company-ko jolni manderang matnangattokaha ineba APA-ni president parakataha.
“Ia company, Garo Hills-ni dingtang dingtang biaprango a·ningni gam-jinrangko nisigalanichi manderangoniko ra·seke ra·enga aro ian Garo Hills gimiknan gimaani ong·enga,” ine Marak parakataha.
Indake ong·engon, Garo Hills-ni dingtang dingtang biaprango ia company-ni an·cheng kitaniko ta·raken champengatchina aro ia company-ni kosako rakgipa ja·kurangko de·china gitaba APA-ni president, Simsanggre Forest Range-ni District Forest & Environment Officer-ko didiataha.