TURA: North Garo Hills a·jani Resubelpara jolrango tarienggipa PWD ramarangko name tarijaenga ine GHADC-ni Rongrong MDC Rinaldo K Sangma parakatenba, iani bidingo North Garo Hills a·jani Deputy Commissioner aro PWD official-rangna badi ka·doangaha.
Sangma-ni parakatani gitade, Beru Bari aro Sarongkol jolrango songdongenggipa manderangni badi ka·anirangko man·soani ja·man ua an·tangan Budbar salo, ia ramarangko re·ange nieaha aro ia ramarangko tarianirang namsrangjaenga ine nikna man·aha.
“Ia ramako tariani bidingo anga North Garo Hills PWD Roads-ni Executive Engineer-o sing·sandiaton ia ramako tarina saksa Takin Arengh minggipa contractor-na on·aha ine anga ma·sina man·aha indiba ia contractor-ara Resubelpara MLA-ni sepangbatgipa ripengrangoni saksa ong·achim. Resubelpara-o bang·bata kamrangkon ia contractor jako ra·e ka·aha indiba uni ka·gipa bang·bata kamrangon namgijaniko anga nikna man·aha,” ine Rongrong MDC parakataha.
Iani bidingo ua North Garo Hills a·jani Deputy Commissioner-na badi ka·doatenba, kamrangko namdapatna gita contractor-na ge·etaniko on·china u·iataha ine janapatengon, iani bidingo ua Public Accounts Committee-naba bakan sedoatgen ine Sangma parakataha.
