TURA: West Garo Hills a·jani Selsella jolrango Fire & Emergency Service station-rang dongkujaengani a·sel wa·al kamani somoirango songni manderang neng·nikanirangko chagrongna nangtokengani gimin Selsella-ni ASWA, FKJGP aro GSU dolrang, Selsella-o Fire & Emergency Service station-ko kulichina, a·dokni Chief Minister Conrad K Sangma-ko didiataha.
Ia dolgittam NGO-rangni parakatani gitade, Selsella-o mande jelbra jelsuani batrorobaengoba ia jolrango Fire & Emergency Service Station-rang dongkujani gimin wa·al kamani somoirango maming chel·chakanirangko man·pajaenga aro uandaken wa·al kamani somoirango songni manderang chu·gimik noksan ong·atanirangko man·na nangtokengachim.
“Wa·al kamani somoirango ta·raken dakchakanirangko on·na man·na nangachim indiba Selsella jolrango da·o dipet Fire & Emergency Service station-rang dongkujani gimin wa·al kamani somoirangoba maming dakchakanirangko man·jaenga aro an·tangtangsa wa·alrangko kimitna nangenga. Iani a·selan wa·al kamani somoirango nok gimikko kamgope nokdangni manderang bilongen noksan ong·atako man·na nangtokenga,” ine Selsella-ni dolgittam NGO-rang parakataha.
Selsella-o Fire & Emergency Service station-ko kuligenchimode ian rang·gitik a·sel ong·ani somoirango ta·rake dakchakanirangko on·na man·an baksana da·o gita a·sel ong·ani somoirangona manderangni tarisamsoanirangoba dakchakanirangko on·na man·genchim ineba dolgittam NGO-rang, Chief Minister-na sedoatgipa chittio janapataha.
