TURA: Ro·ong pil·gimin gitcham matburingrangni dongsparangko Geological Survey of India (GSI)-ni am·sandigiparang, South Garo Hills a·jani Tolegre samba jolo donggipa Gongdap songoniko man·aha.
Koborko on·ani gitade, ia fossils ba ro·ong pil·gimin bimangrangko GSI-ni am·sandigiparang, ia bilsini February jaon nikaha aro ian lakni lak bilsirang ong·gipa gitcham matburingrangni dongsparangsa ong·achim.
Ia matburingrangara badita bilsirangni ong·achim aro mai matburingrang ong·achim uko GSI-ni official-rang, laboratory-o porikka ra·e nianggen ineba kobor on·aha.
Ia fossils ba ro·ong pil·gimin gitcham matburingrangni dongspako GSI-ni am·sandigiparang, chong·motan Tudor Tamas, Milton Sangma aro Salban M Sangma, Core Geo Expedition-ni bak gita South Garo Hills a·jani Tolegre samba jolo donggipa Gongdap songoniko am·sandienba nikaha.
India a·songo ian skanggipa changna iandakgipa gitcham matburingrangni dongspako nikani ong·naba gnang ine GSI-ni official-rang, chanchichipenganiko parakataha.
