Tura LS seat-o Congress dol toromchi vote-rangko salna jotton ka·a ine NPP matnanga

SHILLONG: Tura Lok Sabha constituency-o Congress dol, toromchi manderangni vote-rangko salna jotton ka·ahaoba ia election-o National People’s Party (NPP), bang·gija vote-rangchi chepiltaigen ine a·kangataha.
A·dokni PHE Minister aro NPP-ni dilgipa Marcuise N Marak-ni parakatani gitade, ia chang Lok Sabha election-o Congress dol, toromni gita Garo Hills-o manderangni gisikrangko salna jotton ka·aha aro election-o bilaken susaaba susagrikahachim indiba NPP-ni candidate Agatha K Sangma, an·tangni biapko ra·riktaipilgen.
Tura Lok Sabha election-o Congress dolni bilake susagrikahani gimin aiao inmananiko ra·baahachim ine janapatengon, “Tura seat-ko chinga bang·gija vote-rangchiba chena ka·dongkuenga,” ine Marak aganaha.
Garo Hills-ni manderangko toromchi salna jotton ka·aha ine Congress dolko matnangatengon, election-ni somoirango Congress dol, badiaba badiaba biaprango gilja nok so·anirangko aro manderangni kosako kal·ake rogipa gitcham video-rangko mesoke manderangni vote-rangko salna jotton ka·aha aro bang·bata manderangan iani giminsa Congress dolna pu·ontokaha ine Marak parakataha.
Batanggimin bilsi 47-ni gisepo Lok Sabha-ni gitcham Speaker Purno A Sangma sagini nokdang, Tura MP-ni seat-ko ra·ahaoba Garo Hills-na mamingkon dakjaha ine matnanganinaba ua Congress dolni working president Deborah Marak-ko jegalataha.
Deborah Marak an·tangan, skango Meghalaya a·dokni Deputy Chief Minister ong·ahaoba PA Sangma-ni Meghalaya a·dokna on·gilanirangko gualaha ineba NPP-ni dilgipa aganaha.
“PA Sangma-ni kamrangko darangan nika aro ma·sia. Uan a·doko songdongenggipa manderangni mikkang gita ong·achim aro uni a·selsa India a·song aro gipin a·songni manderangba Meghalaya a·dokko ma·sitokpaaha. Tura-ni MP ong·engmiting somoirango PA Sangma sagi, union minister aro Lok Sabha-ni Speaker-ba ong·e an·tangna on·gimin daitorangko name chu·sokataha. Uni dilna changaniko Delhi-osan ong·aigija a·gilsak gimikon mitteltoka,” ine Marak parakataha.