Mikkarang wajaode obostarang namjabatangnaba gnang
SHILLONG: Meghalaya a·dokni pilak biaprangon ia sal somoirango chaktopilgija ding·anirang batroroengon, a·dokni skotong Shillong aro Tura jillarango da·o manderang chiko chu·onga gita man·jae neng·nikanirangko man·tokengaha.
Shillong aro Tura jillani dingtang dingtang biaprango songdongenggipa manderang chirangko man·jae neng·nikanirangko man·na nangtokengon, a·doko mikkarang wakujagenchimoba obostarang namjabatangnaba gnang ine kenchaksoanirang dongenga.
Iani bidingo a·dok sorkari Budbar salo, dingtang dingtang department-rang baksa tom·aniko ong·atangaha aro ia tom·anio a·dokni Chief Minister aro Chief Secretary-ba bakko ra·e, Shillong aro Tura-o ong·enggipa obostarangko nipilangaha.
Tom·a matchotani ja·man a·dokni PHE Minister Marcuise Marak, kobor ra·timgipa manderang baksa agangrikengon, Shillong aro Tura jilla damgnion chibisikrango chirang dongjae, dingtang dingtang gittimrango songdongenggipa manderangna chirangko chu·onga gita on·na man·jaenga ine an·tangni suk ong·gijaniko parakataha.
“Ian a·gilsakni ding·a batroroengani a·selsa ong·engani gimin chinga iani bidingo mamingkoba dakna man·jaenga. Tura-ode chi jokani 20 percent-ni gita komiangaha,” ine Marak parakataha.
Ia neng·nikanirangko chel·chakna gita sorkari cholrangko sandina jotton ka·enga ine janapatengon, “Da·o ong·enggipa obostana sorkari namen jajrengchakenga maina da·o jasarangna mikka wagija dongangkua ong·ode an·chingna mai ong·gen. An·ching chikon man·srangjanaba dongaha,” ine PHE Minister aganaha.
Greater Shillong Water Supply Scheme Phase III-ko a·bachengatna man·genchimode Shillong-o china neng·nikanirangko namatna man·genchimma ine sing·anina aganchakaniko on·angskaengon, ia scheme-ko a·bachengatna man·genchimoba mikka gride maming namgniko ra·bana man·jawa ine Marak parakataha.
Shillong-na chiko on·enggipa Umiew aro Tura-na chi on·enggipa Ganol chibimani chibisikrangko tangatpilna gita sorkari, gong kror 350-mangni project-rangko a·bachengatenga ineba PHE Minister parakatskaaha.
