TURA: South Garo Hills a·jani Baghmara-o donggipa State Bank of India (SBI)-ni Automated Teller Machine (ATM) kam ka·jaengani a·sel tangka okna nanggipa manderang neng·nikanirangko chagrongna nangtokenga ine A·chik Holistic Awakening Movement (AHAM) Southern Zone parakatenba, iani bidingo South Garo Hills a·jani Deputy Commissioner-na badi ka·doangaha.
AHAM Southern Zone-ni parakatani gitade, Baghmara police station-ni sambao donggipa SBI-ni ATM, bilsisa batpilen nosto ong·e dongengahachim aro iani bidingo SBI Baghmara branch-na changni chang badi ka·doangahaoba da·alonan ia ATM-ko taripile on·kujaengachim.
“Uni gimin jolo songdongenggipa manderangni namgnina ia ATM-ko ta·raken taripilna nangchongmotenga,” ine AHAM-SZ, South Garo Hills a·jani Deputy Commissioner-na sedoatgipa chittio parakataha.
Ia biapo gital ATM-ko dongenchimode aro ATM baksana tangka chipani machine-ko donna man·genchimode manderangni neng·nikanirangko namatna man·genchim ineba AHAM-SZ-ni dilgiparang parakataha.
SBI Baghmara branch-o passbook update ka·namangmangba ro·bee riting dakna nangengani gimin ATM booth-o passbook update ka·ani machine-ko donchina gitaba AHAM-SZ-ni dilgiparang ku·pattianiko on·angaha.
