SHILLONG: Covishield vaccine, be·enna namgi-janiko ra·baa (side effect) ine kobor jangani gimin Health Minister Ampareen Lyngdoh, talataniko on·atengon, “Covishield vaccine-ko su·giparang darangba neng·nika man·aniko agana dongja, uni gimin manderang jajrengna nangja” ine aganaha.
Covid-19 sajinma sokani somoio Meghalaya-ni bang·batan covishield vaccine-ko su·aha, aro adita salrang skangsan samko tarigipa company, covishield samni side effect ba be·enna maiba neng·-nikatanirang dongnaba donga ine Court-o ra·-chakaha. Ia mamlao The Shillong Times-ni kobor ra·timgiparang baksa agangrikmitingo Health Minister Ampareen Lyngdoh, indine aganaha, ” am·sandiao million 1 manderangoni sak 7 manderango side effect-ko nikna man·aha.”
“Data-ko nigrike, ma·mong sorkari ia mamlako name dake san·dikuenga, aro report-ko sengenga,” ine Lyngdoh aganaha.
A·dok sorkari, ia mamlao Health Ministry aro India sorkari baksa agan-grikenga, niatgenchimode public health expert-rangni on·gipa data-ni gita, COVID vaccination, sajinmani somoio bang·a manderangni janggiko jokataha ine Minister aganaha.
“Gimik vaccine -ni AEFI (Adverse Events Following Immunisation) donga gitan, haida side effect dongnaba gnang. Indiba an·ching a·doko AEFI case mingsaba dongja, uni gimin an·ching jajrengna nangja, ine agankuaha.
