SHILLONG: “CM CONNECT”, ian songdonggiparangni neng·nikanirangko sorkariona sokate on·a miksonganio public service delivery system ong·a, iano sak 4,000-ni gita manderang donga, ine Chief Minister Conrad K Sangma Sukrobar salo parakangaha.
CM CONNECT-ko ia bilsini Febraury 15 tariko a·bachengataha, manderang uamangnni matnangatani aro nangnikaniko segatangna helpline number 1971 ba toll-free number 18002456851, ba WhatsApp 9436394363number-ona see watatna man·gen.
Programme-ni gnigipa gadangni ning·o, Chief Minister da·o public hearing-ko pangnan dakanichi manderang baksa joljolan agangrikanggen.
“CM CONNECT programm-ni ning·o gadang gittam donga jekon chinga a·bachengataha. Skanggipa gadango ian call centre ong·a jean da·o kam ka·enga. Iano chinga batanggimin adita jarango ge-4,000 call ka·atarangko man·soaha aro ia number-ko jakkalangkuenga,” ine Secretariat-o tom·ani ja·man kobor ra·timgiparangna Sangma aganangaha.
“CM CONNECT-ni gnigipa gadang public hearing-ni gita ong·gen jeon anga manderang baksa joljolan agangrikanggen. Public hearing-ko dingtang dingtang block-rango pangnan ong·atanggen aro sorkari official-rangni gita dongpagen,” ine ua aganaha.
Gittamgipa gadangni ning·o CM CONECT office-rangko a·dokni dingtang dingtang bakrango kuligen. Songdonggipa manderang ia office-rangona u·iatanirangko chimongangna re·angna man·gen aro mongsonggipa dingtang dingtang scheme-rangna galangna man·gen aroba uamangni matnanganirangko on·angna man·gen, ine chief minister agandapangaha.
