SHILLONG: Tangka kror 150-ni Integrated Command and Control Centre (ICCC) jeni ning·on songjinmanirangni dingtang dingtang mongsonggipa bakrango mikkang ma·sijolaigipa baksa ge-300 na bate nambatgipa CCTV camera-rangko tekangenga, iako tariangengaha aro July jaoni chalaiangna man·ba donggnok.
“Shillong Smart City project-ni ning·o Integrated Command and Control Centre-na tangka kror 150-ko chamanaha. Kamrangko ka·angengaha aro na·simang nikanggen dingtang dingtang rama junction-rango nambatgipa camera-rangko tekangengaha,” ine iako Sukrobar salo0 Chief Minister Conrad K. Sangma parakangaha.
IGP rama junction-o bera dimpenge camera-rangko tekangani kam ka·anggipani gimin ua talatangaha.
“Ge-300-na bate camera-rangko tekanggen aro ian dingtangmancha mikkang ma·sijolaigipa software baksa ong·anggen. Integrated Command Centre-ko New Shillong Township-ni IT Park sepango rikanggen aro iako July jao oprakna chinga ka·dongsoenga,” ine ua aganaha.
Chel·chakani bidingo ua aganangaha, camera-rang gimikkode rim·a man·janaba donga indiba mande mikkangrangko ma·sianganichi kam ka·angna man·gen.
“Jensomoio camera-rangko chalaianggen, mikkangchi ian namgijagipa kam ka·arangko komiatna dakchakgen ine chinga ka·donga aro dingtang dingtang mamlarango sakkirangko man·angna ian police-na dakchakani ong·gen,” ine ua aganaha.
Ua indakeba janapangaha, namgijagipa kamrangko chu·gimik bon·atnade man·ja maina chingo kona noksikni ge·antion camera-rang dongja, iano kra gitasan dongaia aro chinga mikkangchi on·dapangnaba donga.
