SHILLONG: Shillong songjinmani Them Iew Mawlong ba Harijan Colony-o songdongenggipa manderangko dingtang biapona apjitani bidingo a·dok sorkari, re·baenggipa June jani 7 tariko, Harijan Panchayat Committee (HPC) baksa bon·kame chanchirimangna sienga.
Mongolbar salo, a·dok sorkari HPC-ni dilgiparang baksa tom·e chanchirimangahachim aro ia tom·ani ja·man kobor ra·timgiparang baksa agangrikengon, Harijan Colony-o songdongenggipa 342 nokdangrangko dingtang biapona apjitani bidingo a·dok sorkari, re·baenggipa June 7 tariko HPC-ni dilgiparang baksa bon·kame chanchirimanggen aro uni ja·man nanga gita ja·kurangko de·anggnok ine a·dokni Deputy Chief Minister aro Home Minister Prestone Tynsong parakataha.
“Harijan Colony-ko apjitani bidingo nangchongmotgipa kamrangni gimin chinga da·alo HPC baksa agangrikaha aro ia manderangko apjitaniara pangna jolnasa ong·engahani gimin chinga June jao bon·kame chanchirimtaina tik ka·angaha,” ine Tynsong aganaha.
Tynsong-ni parakatani gitade, June-ni 7 tariko sorkari baksa bon·kame chanchirimtaina skang, da·alo je kamrangni giminan apsan chanchirimahachim, iani bidingo HPC-ni dilgiparang, an·tangtangni manderang baksa agangrikchengna somoiko bi·angaha.
Them Iew Mawlong-o songdongenggipa 342 nokdangrangoni 194 nokdangrangsan sorkario kam ka·giparang ong·a ine Hynnewtrep Youth Council (HYC)-ni RTI ka·e sing·sandianina SMB-ni aganchakaniko on·gipani bidingo Urban Affairs department-ni Director aro SMB-ni Chief Executive Officer (CEO)-ko talbate am·sandichina gita ge·etaniko on·ataha ineba Deputy CM parakataha.
SMB-ni RTI-na aganchakaniko man·soani ja·man, Them Iew Mawlong-o songdongenggipa 148 nokdangrangde niam gri songdongenggiparangsa ine HYC, ia nokdangrangko a·rikgalchina sorkario dabiengachim ine nikna man·a.
Indake ong·engon, 1996 bilsio Them Iew Mawlong-o wa·al kamgopanichi bang·bata quarter-rangkon wa·al kamchapaha aro ia nokrangko wa·al kamanio nangchongmotgipa lekkarang gimaatako man·aha ineba Tynsong parakataha.
“Ia lekkarangko gimaatahani gimin 2008 aro 2009 bilsirangosa Urban Affairs-ni director, Them Metor-o donggipa nokdangrangni gimin gital dake am·sandichina MUDA-na ge·etaniko on·aha aro uandaken uamang gital dake survey-ko ka·taina nangaha. Uni gimin da·o SMB-ni RTI-na aganchakaniko MUDA aro Urban Affairs-ni Director, talbate am·sandichenggen aro uni ja·mansa kakketko ma·sina man·gen,” ine ua aganaha.
Ia biapo niam gri songdongenggipa nokdangrangnade sorkari, biaprangko on·na man·jawa ineba Deputy Chief Minister, talataniko on·angskaaha.
Sorkarini kamrangko jegipade dongaigen ine janapatskaengon, “2018 bilsio sorkari, iani bidingon high level committee (HLC)-ko songaha indiba ua somoioni da·alona kingkingan ia kamrangko matchotatna man·kujaenga ine bang·a manderangan matnangtokenga. Indiba sorkari, ia kamko chu·sokatna kang·kare kamanaha aro a·doko songdongenggipa manderangni namgnina ia kamko ta·raken chu·sokatgnok,” ine Tynsong parakataha.