RESUBELPARA: Meghalaya Legislative Assembly-ni Deputy Speaker aro Resubelpara constituency-ni MLA Timothy D Shira, constituency-tango donggipa rama jal·langrangko tarina gisiko nangjaengani a·sel jolo songdongenggipa manderang neng·nikanirangko chagrongna nangtokenga ine GHADC-ni Rongrong MDC Rinaldo K Sangma matnangataha.
Sangma-ni parakatani gitade, adita salrangna skang, social media-rango skul bi·sarangni chiblok dakgipa ramarangko re·aniko nikna man·anian Deputy Speaker-ni constituency-tangna simsak nirokna gisik nanggijaniko mesokani ong·aha.
Ia video-ara a·dok sorkarini Resubelpara constituency-na simsakgijaniko mesokani ong·aha ine janapatengon, ian Assembly-ni Deputy Speaker aro Resubelpara MLA-ni ku·rachakatangko chu·sokatchina gisik ra·atpilaniba ong·enga ine Rongrong MDC parakataha.
“Re·anggipa election-rango chief minister aro dingtang dingtang minister-rang ia ramarang gitan re·rurae, ia ramako gital dake taripile on·na ku·rachakanirangkoba on·ahachim indiba 2018 bilsionin changsaba ia ramarangko taripile on·a dongkujaenga,” ine Sangma, suk ong·gijaniko parakataha.
Resubelpara-ni ramarang a·kolrara dake re·na dona namen namsrangjaengaha ine janapatskaengon, ia ramarangko name tariani pal, MLA-ko ja·rikgipa manderangsa, namgijagipa bosturangchi ia ramarangko alamla taridape donenga ine Sangma matnangataha.
Indake ong·engon, Resubelpara jolo songdongenggipa manderangni namgnina, aro mongsongbate skulrangchi re·ruraenggipa chatro chatrirangni namgnina ta·raken ia ramako niangenba, ia ramarangko tarina gita a·dok sorkari baksa agangrikchina Rongrong MDC, Assembly-ni Deputy Speaker aro Resubelpara-ni MLA-ko didiataha.