SHILLONG: Dingtang dingtang kamrangko ka·anio kamrang namjani gimin ‘blacklist’ ka·a man·gipa ARSS Infrastructure Project Ltd company-na Garo Hills-o kamrangko on·kuenggipani bidingo sing·anirangna maming aganchakanirangko on·kujaengani gimin NPP-chi dilenggipa MDA sorkariko Tura-ni MDC aro BJP-ni state vice president Bernard N Marak matnangataha.
“Da·alona kingkingan anga darangonikoba aganchakanirangko man·sokujaenga. Uamang angna aganchakja ong·ode anga sorkarina sedoattaigen. Ia company ‘blacklist’ ka·a man·gipasa ong·ode maikai Garo Hills-o kamrangko ka·na man·engkua, iani bidingo chingna talataniko on·na nangchongmota,” ine Marak parakataha.
Marak-ni parakatani gitade, National Highway (NH-51) ramako matchotatna gita Manoranjan Company-nasa on·chengahachim indiba ia company somoi gita kamrangko matchotatna man·jahani gimin ja·mano kamrangko Shubham minggipa company-na on·skaahachim.
“Ia company-ko ARSS-sa chalaienga aro kam ka·giparang gimikan ARSS-nisa ong·a. Shillong-Dawki ramako tarianirang namjani giminan ARSS company-ko ‘blacklist’ ka·ahachim,” ine Tura-ni BJP MDC parakataha.
“Iandake biming namgijako man·gipa company-rangni a·doko kam ka·aniko chinga nangnikja. Meghalaya a·dokni gipin bakrangode ARSS company-ko kam ka·na on·jahachim indide maini gimin Garo Hills-o ia company-ko kam ka·na on·engkua. Manderang ia company-ni kamrango kusi ong·jae angna badi ka·tokenga,” ine Marak parakataha.
ARSS company-o trading licence-ba dongja aro professional tax-ko gamna gita GHADC-o register ka·kujani a·sel GHADC, kajinarangko gimaatna nangenga ineba Tura-ni MDC aganaha.
Shillong-Dawki Road Project-ni Package-II ning·o Mylliem-oni Pynursla-ona rama tarianirang namjani gimin ARSS Infrastructure Projects Ltd company-ni contract-ko NHIDCL den·galpilaha ine 2023 bilsini April jao, a·dokni Deputy Chief Minister aro PWD (Roads) Minister Prestone Tynsong-ba parakatahachim.
Kam ka·anirang namjani gimin ‘blacklist’ ka·a man·gipa ARSS company maikai Garo Hills-o kamrangko ka·na man·skaenga ine adita salrangna skangsan, Tura-ni MDC Bernard N Marak sing·doatenba, iani bidingo seachi aganchakaniko on·china gita a·dokni Chief Minister Conrad K Sangma-na sedoatahachim ine nikna man·a.
