SHILLONG: Lok Sabha election-na dongimin Model Code of Conduct (MCC) matchotahaon, Shillong Ropeway Project-na tender-rangko June-ni 15 tarikrango kulignok aro kamrangko July jao on·anggnok ine Budbar salo, a·dokni Tourism Minister Paul Lyngdoh parakataha.
“Expression of Interest (EoI)-ko da·o on·manahani gimin draft EPI-o donggijagipa ia project-ni mitam kamrangko mesoke on·na gita talatanirangko on·engaha. MCC-na dongimin somoirang matchotahaon tender-rangko kulignok,” ine Lyngdoh aganaha.
Lyngdoh-ni parakatani gitade, Lok Sabha election-na dongimin MCC matchotahaon, Shillong Ropeway project-na tender-rangko June-ni 10 ba 15 tarikrango kuligen aro uni ja·man July jani skanggipa antirangon kamrangko pakwate on·anggnok.
Lawsohtun-oni Shillong Peak-ona a·dokni skanggipa passenger ropeway-ko kros 138 korosrangchi tarina gita a·dokni Cabinet, re·anggipa 2022 bilsini September jaon ra·chakangahachim ine nikna man·a.
Ia Shillong Ropeway project-ko Madan Laban-o donggipa terminal point-oni Lumparing-chipakna aro Shillong Peak-ni view point-ona tarina miksongengachim.
Ia ropeway-o a·bachengode ding 12 cable-rang donggen aro iako European standard-o tarina siengachim.
