Til·ekdraa man·gipa me·chikrangna kakket bichalko dabie Kochrang re·joma

AMPATI: Adita salrangna skang, South West Garo Hills a·jao Chenga Benga Mela-ko ong·atanio drae til·ekako man·gipa me·chik bi·sarangna kakket bichalko on·china dabie Bristibar salo, Meghalaya Koch Students Union (MKSU), Ampati-o jinma re·jomaniko ong·atangaha.
Jinma re·jomaniko Ghasura Cultural Centre-oni a·bachengatenba, Ampati-o donggipa Deputy Commissioner’s (DC) Office-ona ong·ataha aro ia re·jomanio, Meghalaya  Koch Association, Meghalaya Koch Women Association, All A·chik Youth Federation, Meghalaya Hajong Welfare Association, Meghalaya Koch Association, Garo Students Union, A·chik Holistic Awakening Movement, A·chik Youth Welfare Organisation aro Akhil Bhartiya Vidyarthi Parishad dolrangba bak ra·angtokaha.
A·doko songdongenggipa me·chikrangna naljokanirangko on·na nangengani gimin aro drae til·eka man·gipa me·chikrangna kakket bichalko on·china dabie, Meghalaya Koch Students Union-ni gita dingtangmancha South West Garo Hills a·jani Deputy Commissioner-na memorandum-koba on·angjolaha.
Ia re·jomanio dingtang dingtang dolrang aro jolo songdongenggipa manderang sak 7,654-na baten bak ra·angtokaha ine MKSU-ni dilgiparang parakataha.
Re·anggipa April-ni 16 tariko, me·chik bi·sa sakgni, an·tangtangni ripeng sakgni baksa South West Garo Hills a·jani Gandhipara songo ong·atanggipa Chenga Benga Mela-ona re·angahachim.
Skanggipao, me·chik bi·sa saksa an·tangni me·asa ripeng baksa, mela-ko ong·atenggipa biaponi adita chel·kala biapona re·angon, ua biapo dolsa manderang uamangko timsoenba chadrapsoaha aro me·asako siboke dokani ja·man me·chik bi·sakoba doke sibokataha. Me·chik bi·sa sibokani ja·man, ia manderang me·chik bi·sako kragija dake kal·aka aro me·chik bi·sa sibokani a·sel ia manderangko ma·sirikjaha.
Iani ja·mano, sakgipin me·chik bi·saba, an·tangni me·asa ripeng baksa apsan biapona re·angon, uano ia apsan manderangan dongsoenba me·asa bi·sako kae dokaha aro me·chikkoba ia manderang kragija dake dokaha ine police-rang u·iataha.
Ia a·selni bidingo dos dakgipa manderangoni sak 9 manderangkode rim·na man·ahachim aro ia manderangara gimikan a·sel ong·gipa biap sambao donggipa Assam a·dokni Teporpara songoni ong·achim.