SHILLONG: Meghalaya a·doko mongsonggipa rama dilgniko tarina gita National Highways & Infrastructure Development Corporation (NHIDCL) survey ka·engaha ine sorkari u·iataha.
Iani bidingo kobor ra·timgiparangna talataniko on·angengon, Umiam flyover-oni Shillong Civil Hospital junction-ona dakanggipa ramako sorkari, NHIDCL-na pakwate on·manaha aro Umiam-oni Shillong-ona dingtang ramako tarina gita uamang alignment survey-ko ka·engaha ine a·dokni Deputy Chief Minister aro PWD (Roads) Minister Prestone Tynsong parakataha.
“NHIDCL-ni survey ka·anirang matchotahaon uamang dingtang dingtang permit-rangna sorkariona re·bagen,” ine Tynsong aganaha.
Iana agreba, Umiam flyover-oni Malidor-ona dakanggipa ramako Bharatmala Road Project-ni ning·o four-lane rama tarina gita NHIDCL, survey-ko ka·engaha ine Deputy CM parakataha.
National Highway (NH-6) ramani obosta namjabatroroengahani gimin aro Sonapur tunnel-ni wilwilao a·arang rurongenganichi manderang neng·nikanirangko man·na nangenggipani gimin janapatskaengon, iani bidingo ua Road Transport & Highways Ministry-ni Secretary aro National Highways Authority of India (NHAI)-ni Chairman baksa agangrikmanaha ine PWD (Roads) Minister parakataha.
NH-6 ramako tarina gita NHAI, dolgni contractor-rangna kamko on·aha aro da·o kamrang a·bachengengaha ineba ua aganaha.